Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .v. Capittel.

1

⁺ENde ick heb ghesien in die rechte handt des gheens die sadt opden throon, eenen boec ghescreuen binnen ende buyten toe gheseghelt met seuen seghelen,

+ A

2

Ende ick heb ghesien eenen stercken enghel sprekende met luyder stemmen. Wie isser weerdich open te doen den boec, ende open te doen sijn seghelen?

3

Ende niemant en mocht nocht inden hemel, noch in die eerde, noch onder die eerde open doen den boec, noch dien aensien,

4

Ende ick screyde seer om datter niemant weerdich gheuonden en was om den boeck open te doen, noch dien te sien.

5

Ende een van de ouderen heeft tot my gheseyt. ⁺En weent niet, siet den leeuw van Iudas gheslachte die wortel van Dauid heeft verwonnen om open te doen den boeck, ende te ontsluyten sijn seuen seghelen,

+ B

6

Ende ick heb ghesien, ende siet int midden vanden throon, ende der vier dieren, ende int midden der ouderen een lam staende als oft ghedoot ware, hebbende seuen hornen, ende seuen oogen, welc sijn die seuen gheesten Gods ghesonden ouer alle eertrijc.

7

Ende het is ghecomen, ende theeft ghenomen wt die rechte hant vanden ghenen die inden throon sadt den boeck.

8

Ende alst den boec open ghedaen hadde, soo sijn die vier dieren, ende die vierentwintich ouders gheuallen voor dlam, hebbende elck herpen, ende gulden scalen vol rueckoffers, ⁺welc sijn die ghebeden der heyligen,

+ C

9

ende sij songhen eenen nieuwen sanc seggende. Ghy sijt weerdich Heere te nemen den boeck, ende sijn seghelen open te doen, want ghy sijt ghedoot, ende hebt ons verlost Gode in v bloet, wt alle geslachten, ende talen, ende luyden, ende natien,

10

ende ghy hebt ons gemaect onsen Gode tot een conincrijck ende priesters, ende wij sullen regneren op die eerde,

11

Ende ick heb ghesien ende ghehoort die stemme van veel enghelen rontsomme den throon, ende der dieren, ende der ouderen, ende hen ghetal was duysentich duysenden

12

seggende met grooter stemmen. ⁺Weerdich is dlam dat ghedoot is, te nemen cracht, ende godheyt, ende wijsheyt ende stercheyt, ende eere, ende glorie, ende ghebenedijdinghe.

+ D

13

Ende alle die creatueren die inden hemel sijn, ende op die eerde, ende onder die eerde, ende die in die zee sijn, ende alle die in haer sijn, heb ick alle ghehoort seggende. Den ghenen die inden throon sidt, ende den lamme sij gebenedijdinghe, ende eere, ende glorie, ende machticheyt in die eewicheyt der eewicheden.

14

Ende die vier dieren seyden Amen. Ende die vierentwintich ouders sijn gheuallen op hen aensichten, ende sij hebben aenbeden den leuende in die eewicheyt der eewicheden.