Den gheheelen Bybel, Inhoudende het oude ende nieuwe Testament (Leuvense bijbel 1548)

Dat. .iiij. Capittel.

+ 1

⁺HIer nae heb ick ghesien, ende siet een open doere was inden hemel, Ende dierste stemme die ick ghehoort hebbe was als een trompet sprekende met my, segghende. Climt herwaerts op, ende ic sal v toonen wat ghescieden moet cortelinge hier nae.

+ A

2

Ter stont heb ic gheweest inden geest. Ende siet eenen stoel was ghestelt inden hemel, ende opden stoel een sittende,

3

ende die daer sadt was ghelijc van aensien den Iaspis steen, ende den Sardius, ende eenen regenboghe was rontsom den stoel

[p. *916]

ghelijck het ghesicht van eenen smaragdus,

4

Ende rontsomme dien stoel vierentwintich setels, ⁺ende op die setels vierentwintich ouderen sittende al om ghecleedt met witte cleederen, ende op hen hoofden gulden croonen,

+ B

5

Ende vanden throon quamen wt blixemen, ende stemmen, ende donderen, ende seuen lampen berrende voor den throon, welck sijn die seuen gheesten Godts

6

Ende voor daenschijn des stoels, als een gelasen zee ghelijck den Cristalle, ende int midden des stoels, ende rontsomme den stoel vier dieren vol ooghen, voor ende achter,

7

⁺Ende dierste dier was ghelijck eenen leeuw, ende het tweede dier ghelijck een calf, ende tderde dier hebbende als eens menschens aensicht, ende tvierde dier was ghelijck eenen vlieghenden arent,

+ C

8

Ende die vier dieren hadden elck ses vloghelen rontsomme, ende binnen sijn die vol oogen, ende sij en hadden gheen ruste nacht ende dach seggende. Heylich, heylich, heylich, Heere Godt almachtich die was, ende die is, ende die comen sal,

9

⁺Ende als die dieren gauen glorie, ende eere, ende benedictie den ghenen die opden throon sadt die daer leeft in die eewicheyt der eewicheden,

+ D

10

soo vielen die vierentwintich ouders neder voor den throon, ende sij aenbaden den ghenen die daer leeft inder eewicheyt der eewicheden, ende sij wierpen hen croonen voor den throon seggende.

11

Weerdich sijdi Heere onse Godt te ontfanghen glorie, ende eere, ende cracht, want ghy hebbet al ghescapen ende om uwen wille waren sij, ende sijn sij ghescapen.