Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺ENde den Enghel der kercken te Sardis scrijft. Dit seyt hy die de seuen gheesten Godts heeft ende die seuen sterren. Ick weet v wercken, dat ghy den naem hebt dat ghy leeft, ende ghy sijt doot,

+ A

2

Weest wacker, ende versterct die andere die steruen souden, want ick en vinde v wercken niet vol voor mijnen Godt.

3

Daerom hebt in v ghedachte hoe dat ghijt ontfanghen ende ghehoort hebt, ende bewaert, ende doet penitencie, Daerom eest dat ghy niet en waect, soo sal ick tot v comen als een dief, ende ghy en sult niet weten wat vren dat ick tot v comen sal,

4

Maer ghy hebt een luttel namen in Sardis, die hen cleederen niet besmet en hebben, ende sij sullen met my wandelen in witte cleederen, want sij des weerdich sijn.

5

Soo wie verwinnet die sal alsoo ghecleedt worden met witte cleederen, ende ick en sal sijnen naem niet wt vaghen wt den boeck des leuens, ⁺ende ick sal sijnen naem belijden voor mijnen vader, ende voor sijn Enghelen,

+ B

6

Wie ooren heeft die hoore wat die gheest spreect den kercken.

7

Ende den Enghel van die kercke van Philadelphie scrijft. Dit seyt die heylighe ende warachtige, die Dauids slotel heeft, die open doet ende niemant en sluytet, die sluyt ende niemant en doet open,

8

Ick weet v wercken. Siet ick heb voor v ghegheuen een open doere die niemant sluyten en mach, want ghy hebt een cleyne cracht, ende ghy hebt mijn woort ghehouden, ende ghy en hebt mijnen naem niet gheloochent.

9

Siet ick salse gheuen van Satanas Sinagoge die segghen dat sij Ioden sijn, ende sij en sijns niet, maer sij lieghen. Siet ick salse maken dat sij comen sullen ende aenbidden voor v voeten, ende sij sullen weten dat ick v lief heb ghehadt,

10

want ghy behouden hebt het woort van mijnder patientien, ende ick sal v bewaren van die vre der temptacien, die comen sal in die gheheel werelt om te tempteren die ghene die op deerde woonen,

11

⁺Siet ick come corts, hout dat ghy hebt, op dat niemant v croone en neme.

+ C

12

Soo wie verwint ick sal hem maken een columne inden tempel mijns Godts, ende hy en sal niet meer buyten gaen, ende ick sal op hem scrijuen den naem mijns Godts, ende den naem van mijns Godts nieuwe stadt Ierusalem die nederghedaelt is vanden hemel van mijnen Godt, ende mijnen nieuwen naem.

13

Wie ooren heeft die hoore, wat die gheest seyt den kercken,

14

Ende den Enghel der kercken van Laodicien scrijft. Dit seyt Amen die ghetrouwe ende warachtighe ghetuyghe die tbeghinsel is van Godts creatuere,

15

Ick weet v wercken dat ghy noch cout en sijt, noch heet, och oft ghy cout waert, oft heet,

16

maer want ghy lau sijt ende noch cout noch heet, soo sal ick v beghinnen wt te braken wt mijnen mont, want ghy segt.

17

Ic ben rijck, ende oueruloedich gheworden, ende ick en heb gheens dincs ghebrec, ende ghy en weet niet dat ghy onsalich sijt, ⁺ende allendich, ende arm, ende blent, ende naect.

+ D

18

Ick rade v dat ghy van my coopt gout dat doorviert is, op dat ghy rijck wordet, ende dat ghy met witte cleederen moecht aenghedaen worden op dat niet ghesien en worde die scandelijcheyt uwer naectheyt, ende met ooghen salue bestrijct v ooghen op dat ghy sien moecht.

19

Die ick lief hebbe die straffe ende castie ick, Daerom weest sorchuuldich ende doet penitencie.

20

Siet ick staen aen die doere ende cloppe, eest dat iemant mijn stemme hoort ende die doere open doet, tot dien sal ick inghaen, ende ick sal met dien het auontmael eten, ende hy met my.

21

Soo wie verwint, ick sal hem gheuen te sitten met my in mijnen throon, ghelijck ick oock verwonnen hebbe, ende gheseten heb met mijnen vader in sijnen throon.

22

Die ooren heeft die hoore, wat die gheest seydt den kercken.