Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde tot den Enghel van die kercke van Ephesen scrijft. Dit seyt hy die de seuen sterren houdt in sijn rechte hant, die daer wandelt int midden van die seuen gulden candelaren.

+ A

2

Ick weet v wercken ende uwen arbeyt, ende v lijdtsaemheyt, ende hoe dat ghy die quade niet verdraghen en moecht, ende ghy hebtse gheproeft die segghen dat sij Apostelen sijn, ende en sijns niet, ende ghy hebtse loghenachtich gheuonden, ende ghi hebt verduldicheyt,

3

ende hebt verdraghen om mijnen naem, ende ghy en sijt niet flau gheworden.

4

Maer ick heb teghen v een luttel dat ghi v ierste charitate ghelaten hebt,

5

Daerom weest ghedachtich waer af dat ghy gheuallen sijt, ende doet penitencie, ende doet v ierste wercken oft anders come ick v, ende ick sal uwen candelaer veruoeren van sijnder plaetsen, ten sij dat ghy penitencie doet,

6

⁺Maer ghy hebt dat, dat ghy hatet die wercken van die Nicolaiten, die ick ooc hate.

+ B

7

Wie ooren heeft, die hoore wat die gheest seyt den kercken. Den verwinnere sal ick teten gheuen vanden houte des leuens, dat int paradijs mijns Godts is,

8

Ende den Enghel van die kercke te Smyrne scrijft. Dit seydt dierste ende die laetste, die doot gheweest is, ende leuet,

9

Ick weet v tribulacie ende v armoede, maer ghy sijt rijck, ende ghy wort gheblasphemeert van die ghene die segghen dat sij Ioden sijn, ende sij en sijns niet, maer sij sijn een Sinagoge Satane,

10

En vreest niet van die dinghen die ghy lijden sult, ⁺Siet die duyuel salder sommighe van v inden kerker worpen om dat ghy soudt gheproeft worden, ende ghy sult tribulacie hebben thien daghen, Weest ghetrouwe totter doot toe, ende ick sal v gheuen die croone des leuens,

+ C

11

Wie ooren heeft die hoore wat die gheest seydt den kercken. Soo wie verwint die en sal

[p. *915]

niet ghequetst worden van die tweede doodt,

12

Ende den Enghel van die kercke van Pergamo scrijft. Dit seydt hy die tsweert heeft aen beyde sijden scerp,

13

⁺Ick weet waer ghy woont, waer Satanas stoel is, ende ghy houdt mijnen naem, ende ghy en hebt mijn ghelooue niet gheloochent, Ende in die daghen Antipas mijn ghetrouwe ghetuyge die by v lieden ghedoot is daer Satanas woont,

+ D

14

Maer ick heb teghen v een luttel, want ghy hebt daer sommighe houdende Balaams leeringhe, die Balac leerde een verarghernisse te stellen voor die kinderen van Israel, eten ende oncuyscheyt bedrijuen,

15

alsoo hebder ghy oock houdende die leeringhe van die Nicolaiten.

16

Desghelijcs doet penitencie, oft anders sal ick v cortelinghe comen, ende ick sal met die vechten metten sweerde mijns monts.

17

⁺Soo wie een oore heeft die hoore wat die gheest der kercken seyt. Den ghenen die verwint sal ick gheuen verborghen manna, ende ick sal hem eenen witten blinckende steen gheuen, ende inden steen eenen nieuwen naem ghescreuen, den welcken niemant en weet dan dien ontfanct.

+ E

18

Ende den Enghel der kercken van Thyatire scrijft. Dit seyt die sone Godts, die ooghen heeft als een vlamme viers, ende sijn voeten ghelijck fijn metael.

19

Ick ken v wercken ende ghelooue, ende v liefde ende dienst, ende uwe patientie, ende v laetste wercken meer in ghetale dan dierste.

20

Maer ick heb teghen v een luttel, want ghy laet die vrouwe Iezabel die haer seyt een prophetersse te sijn, ⁺leeren ende bedrieghen mijn knechten, hoereren, ende eten vanden offer der afgoden,

+ F

21

Ende ick heb haer tijt ghegheuen dat sij penitencie doen soude, ende sij en wilt gheen penitencie doen van haer oncuyscheyt.

22

Siet ick salse legghen in een bedde, ende alle die met haer ouerspel bedrijuen, sullen in seer groote tribulacie wesen, ten sij dat sij penitencie van haren wercken doen,

23

ende haer kinderen sal ick dootslaen ter doot, ende alle die kercken sullen weten, dat ick ben onder soeckende die nieren ende herten, ende ick sal eenen ieghelijcken van v lieden gheuen nae sijn wercken,

24

⁺Maer v lieden seg ick den anderen die te Thyatiren sijt. Soo wie niet en hebben dese leeringe die niet ghekent en hebben die hoocheyt van Satanas ghelijck sij segghen, ick en sal op v lieden gheenen anderen last legghen,

+ G

25

maer tghene dat ghy hebt, houdt dat tot dat ick come,

26

Ende soo wie verwint ende bewaert totten eynde toe mijn wercken, dien sal ick macht gheuen ouer die Heydenen,

27

ende hy salse regeren met een yseren roede, ende als eens potbackers vat sullen si heel ghebroken worden ghelijck ick oock ontfanghen hebbe van mijnen vader,

28

ende ick sal hem gheuen die morghen sterre,

29

Wie ooren heeft die hoore wat die gheest seyt den kercken.