Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

+ 1

⁺DIE openbaringe Iesu Christi welc hem God ghegheuen heeft om te vercondighen sijnen dienaren, tghene dat corts ghescieden moet, ende heuet te kennen ghegheuen, sendende door sijnen Enghel sijnen dienaer Iohanni,

+ A

2

die ghetuyghenis heeft ghegheuen den woorde Godts, ende tghetuyghenis Iesu Christi al wat hy ghesien heeft.

3

Salich is hy die leeft ende hoort die woorden van deser prophetien, ende bewaert die dinghen die daer in ghescreuen sijn, want den tijt is hier nae by.

4

Ioannes den seuen kercken die in Asien sijn, Gratie sij v ende vrede van hem die is, ende die was, ende die comen sal, ende van die seuen gheesten die voor daenschijn van sijnen throon sijn,

5

⁺ende van Iesu Christo die een ghetrou ghetuyghe is, dierste gheborene der dooden, ende een prince van die coninghen der eerden, die ons bemint heeft, ende heeft ons gewasschen van onse sonden in sijn bloet,

+ B

* 6

ende heeft ons gemaect een rijck, ende priesters Gode ende sijnen vader, hem sij glorie ende heerlicheyt in die eewicheyt der eewicheden Amen.

7

Siet hy coemt metten wolcken, ende hem sullen sien alle ooghen, ende die hem ghesteken hebben, Ende alle die gheslachten der eerden sullen hen seluen ouer hem beclaghen, tis waer, Amen.

8

Ick ben Alpha ende O, tbeghinsel ende deynde seyt die Heere Godt, die is, ende die was, ende die comen sal, die almachtighe.

9

Ic Iohannes v broeder ende medegheselle in die tribulacie, ende int rijck, ⁺ende verduldicheyt in Christo Iesu, heb geweest in deylant dat ghenoemt wort Patmos, om dwoort Godts ende tghetuygenis van Iesu.

+ C

10

Ick heb gheweest inden gheest opten sondach, ende ick heb achter my ghehoort een groote stemme als van een trompette

11

seggende. Wat ghy siet dat scrijft in eenen boec ende sendet den seuen kercken die in Asien sijn, Epheso, ende Smyrne, ende Pergamo, ende Thyatire, ende Sardis, ende Philadelphie, ende Laodicie,

12

Ende ic ben omghekeert dat ick sien soude die stemme die met my sprac. Ende omghekeert sijnde heb ic ghesien seuen gulden candelaren,

13

ende int midden der seuen gulden candelaren eenen ghelijc den sone des menschen, ghecleet met een cleedt totten voeten, ende omgort aen sijn borsten met eenen gulden gordele,

14

maer sijn hooft ende hayr waren wit blinckende, ghelijck witte wolle, ende ghelijc sneeu ende sijn ooghen als een vlamme viers,

15

ende sijn voeten ghelijck fijn metael in eenen gloeyenden ouen, ⁺ende sijn stemme was als die stemme van veel wateren,

+ D

16

ende hy hadde in sijn rechte hant seuen sterren, ende wt sijnen mont ghinck een sweert aen beyde sijden scerp, ende sijn aensicht lichte ghelijc die sonne in haer cracht,

17

Ende als ick hem ghesien hadde, soo ben ick gheuallen aen sijn voeten als doot, Ende hy heeft sijn rechte handt op my gheleydt segghende. En wilt niet vreesen, ick ben dierste ende die laetste,

18

ende leuende, ende ick heb doot gheweest, ende siet ick ben leuende in die eewicheyt der eewicheden, ende ick heb die slotelen der doot, ende der hellen,

19

Daerom scrijft dat ghy ghesien hebt, ende dat daer is, ende dat haestelijck ghescieden moet nae desen,

20

Het sacrament van die seuen sterren die ghy ghesien hebt in mijn rechte hant, ende die seuen gulden candelaren, die seuen sterren sijn die Enghelen der seuen kercken, ende die seuen candelaren sijn die seuen kercken.