Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺SIet wat liefde dat ons die vader ghegheuen heeft, dat wy souden ghenoemt worden, ende wesen, Godts kinderen. Daer om en kent ons die werelt niet, want sy en kent hem niet.

+ A

2

Alderliefste wy sijn nu Godts kinderen, ende ten is noch niet gheopenbaert wat wy sijn sullen. Wy weten dat wy hem ghelijck sullen wesen, als hy gheopenbaert sal worden, want wy sullen hem sien ghelijck hy is.

3

Ende alle die dese hope heeft in hem, die heylicht sij seluen, ghelijck hy oock heylich is.

4

Alle die sonde doet, die doet ongherechticheyt, ende die sonde is ongherechticheyt.

5

Ende ghi weet dat hy gheopenbaert is om dat hy onse sonden afnemen soude, ende in hem en is gheen sonde.

6

Alle die in hem blijft die en sondicht niet, ende alle die sondicht, die en heeft hem niet ghesien, ⁺noch hem ghekent.

+ B

7

Kinderkens. niemant en verleyde v. Die rechtuerdicheyt doet die is rechtuerdich, ghelijc hy oock rechtuerdich is.

8

Die sonde doet die is wten duyuel, want van tbeghinsel sondicht die duyuel. Daer toe is die sone Godts gheopenbaert, om dat hy soude verderuen die wercken des duyuels.

9

Alle die wt Gode gheboren is, die en doet gheen sonde, want sijn saet blijft in hem, ende hy en mach niet sondighen om dat hy wt Gode geboren is.

10

Daer in sijn openbaer Godts kinderen, ende des duyuels kinderen. Alle die niet rechtuerdich en is, die en is wt Gode niet, ende die sijnen broeder niet en bemint.

11

Want dit is die vercondinghe die ghy ghehoort hebt vant beghinsele. Dat ghy malcanderen sult lief hebben.

12

Niet als Cain die wten boosen was, ende heeft sijnen broeder ghedoot. ⁺Ende waer om hy hem dootgheslaghen? Om dat sijn wercken quaet waren, maer sijns broeders wercken rechtuerdich.

+ C

13

+ En wilt v niet verwonderen broeders eest dat v die werelt hatet.

14

Wy weten dat wy ouergheuoert sijn van die doot totten leuen, om dat wy die broeders lief hebben. Wie niet lief en heeft, die blijft in die doot.

15

Alle die sijnen broeder haet, dats een dootslagher. Ende ghy weet wel dat gheen dootslagher het eewich leuen en heeft in hem seluen blijuende.

16

Daer aen hebben wy Gods liefde ghekint, dat hy sijn ziele voer ons ghestelt heeft, wy moeten oock onse zielen voer onse broeders stellen.

17

Die tgoet der werelt heeft, ende siet sijnen broeder noodt hebben, ende sluyt sijn binnenste toe van hem, hoe blijft die liefde Gods in hem?

18

Mijn kinderkens en laet ons niet lief hebben metten woerde, noch metter tonghen, ⁺maer metten werken, ende waerheyt.

+ D

* 19

Daer aen kennen wy dat wy wter waerheyt sijn, ende voer sijn aenschijn sullen wy onse herten wel beraden.

20

Want eest dat ons

[p. *911]

herte ons wroecht soo is Godt meerder dan ons herte, ende hy weet alle dinghen.

21

Alderliefste eest dat ons herte ons niet en wroecht, soo hebben wy betrouwen aen Godt,

22

ende wat wy begheren sullen dat sullen wy ontfanghen van hem, want wy sijn gheboden bewaren, ende doen tghene dat behaghelijck is voer hem.

23

Ende dit is sijn ghebodt, dat wy gheloouen souden inden naem sijns soens Iesu Christi, ende dat wy malcanderen souden liefhebben, ghelijck hy ons gheboden heeft.

24

Ende die sijn gheboden houdt, die blijft in hem, ende hy in dien, ende daer aen weten wy dat hy in ons blijft, aen sijnen gheest den welcken hy ons ghegheuen heeft.