Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

[p. *910]

+ 1

⁺MYn kinderkens dese dinghen scrijue ick v lieden om dat ghy niet sondighen, en soudt. Maer eest datter iemant sondicht, soo hebben wy eenen voersprake bijden vader den rechtuerdighen Iesum Christum,

+ A

2

ende hy is die versoeninghe voer onse sonden, ende niet alleen voer die onse, maer ooc voer der gheheelder werelts sonden.

3

Ende daer aen weten wy dat wy hem ghekent hebben, eest dat wy sijn gheboden onderhouden.

4

Soe wie seyt dat hy hem kent ende sijn gheboden niet en houdt, die is loghenachtich, ende die waerheyt en is in desen niet.

5

Maer die sijn woert houdt, in dien is warachtelijck die liefde Godts volmaect. Daer aen weten wy dat wy in hem sijn.

6

Soe wie seyt dat hy in hem blijft, die moet selue oock wandelen, ghelijck hy ghewandelt heeft.

7

Alderliefste ick en scrijue v lieden gheen nieuwe ghebodt, maer het oude ghebodt, dwelck ghy ghehadt hebt vanden beghinne. Dat oude ghebodt is dwoert dat ghy ghehoort hebt.

8

⁺Weder om scrijue ick v lieden een nieuwe ghebodt, dat warachtich is by hem ende oock by v lieden, want die duysternisse is vergaen, ende dat warachtich licht scijnt nu.

+ B

* 9

Soe wie seyt dat hy int dlicht is ende sijnen broeder hatet, die is in duysternisse tot noch toe.

10

Wie sijnen broeder lief heeft die blijft int licht, ende daer en is gheen arghernisse in hem.

11

Maer wie sijnen broeder hatet, die is in duysternisse ende wandelt in duysternisse, ende hy en weet niet waer henen dat hy gaet. Want die duysternissen hebben sijn ooghen verblint.

12

Kinderkens ick scrijue v dat v sonden v vergheuen worden om sijns naems wille.

13

Ick scrijue tot v ghy vaders, want ghy hebt ghekent den ghenen die van tbeghinsel is. Ick scrijue tot v ghy Ionghelinghen, want ghy hebt den boosen verwonnen.

14

Ick scrijue tot v ghy cleyne kinderkens want ghy hebt den vader ghekent. Ick scrije v ghy ionghe mannen want ghy sijt sterck, ende dwoert Godts blijft in v lieden, ende ghy hebt den boosen verwonnen.

15

En wilt niet lief hebben die werelt, noch tghene dat in die werelt is. Esser iemant die de werelt lief heeft, soo en is die liefde des vaders in hem niet.

16

⁺Want alle dat in die werelt is, dats begheerlijcheyt des vleeschs, ende begheerlijcheyt der ooghen, ende houerdie des leuens, die wten vader niet en is, maer is wt der werelt.

+ C

17

Ende die werelt vergaet, ende haer wellusticheyt. Maer soo wie den wille Gods doet die blijft inder eewicheyt.

18

Kinderkens het is die laetste vre, ende ghelijck ghy ghehoort hebt dat Antechrist coemt, soo sijnder nu veel Antechristen gheworden. Waer wt wy weten dattet die wterste vre is.

19

Wt ons sijn sij ghecomen, maer sij en waren van ons lieden niet. Want hadden sij van ons lieden gheweest, sij souden voerwaer met ons altijt ghebleuen hebben, maer om dat sij souden openbaer wesen, dat sij alle van ons lieden niet en waren.

20

Maer ghy hebt die saluinghe vanden heylighen, ende ghy weet alle dinghen.

21

Ick en heb tot v lieden niet ghescreuen als tot die ghene die de waerheyt niet en weten, maer als tot die ghene diese weten, ende want alle loghene wter waerheyt niet en is.

22

Wie issser loghenachtich dan die ghene die loochent dat Iesus is Christus? ⁺Dit is Antechrist, die den vader loochent ende den sone.

+ D

23

Alle die den sone loochent die en heeft oock den vader niet. Ende wie den sone belijdt, die heeft den vader oock.

24

Dat ghy van beghinsel ghehoort hebt dat blijue in v lieden. Eest dat in v lieden blijft tghene dat ghy ghehoort hebt van tbeghinsel, soo suldi oock inden vader ende inden sone blijuen.

25

Ende dit is die belofte die hy ons beloeft heeft, het eewich leuen.

26

Dit heb ick v lieden ghescreuen van die ghene die v bedrieghen.

27

Ende die saluinghe die ghy van hem ontfanghen hebt laet blijuen in v lieden. Ende ten is v van gheenen noode dat v iemant leere, maer ghelijck zijn saluinghe v leert van alles, soo eest oock warachtich, ende ten is niet gheloghen. Ende ghelijck die v gheleert heeft, soo blijft daer by.

28

Ende nu kinderkens blijft daer by, op dat wy, als hy hem openbaren sal, moghen betrouwen hebben, ende dat wy niet bescaemt en worden van hem in sijn toecoemst.

29

Eest dat ghi weet dat hy rechtuerdich is, soo weet oock dat alle die rechtuerdicheyt doet, wt hem gheboren is.