Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺DAer om want Christus int vleesch gheleden heeft, wapent ghy v seluen oock met dat selue ghedachte. Want die int vleesch gheleden heeft, die heeft opghehouden van sonden,

+ A

2

op dat hy nu voerts den tijt die daer noch ouert int vleesch leuen soude niet nae der menschen lusten, maer nae den wille Gods.

3

Want den voerleden tijt is ghenoech gheweest om den wille der heydenen te ouerbrenghen, den ghenen die ghewandelt hebben in oncuyscheden, wellusticheden, wijnsuypinghen, brasserien, dronckenscappen ende ombehoirlijcke diensten der afgoden,

4

waer in sij hen verwonderen dat ghy daer toe oock niet en loopt met hen in die selue scandelijcheyt der oncuyscheyt blasphemerende,

5

die welcke reden sullen gheuen hem die bereedt is te ordeelen die leuende ende die doode.

6

⁺Want daer om is den dooden oock het euangelie ghepreect, op dat sij voerwaer gheordeelt souden worden na die menschen int vleesch, maer dat sij leuen souden nae Godt inden gheest.

+ B

7

Maer het eynde van al sal naken. * Daer om weest voersienich, ende waect in ghebeden.

8

Maer voer al onderlinghe met malcanderen ghestadighe liefde hebbende. Want die liefde ouerdect die menichte der sonden.

9

Weest gheerne herberghende malcanderen sonder murmuratien.

10

Een ieghelijck alsoo hy ontfanghen heeft die gratie aen malcanderen bedienende, als goede bedienders der menigherande gratie Gods.

11

Eest dat iemant spreect, die spreke als Gods woerden, eest dat iemant dient, die diene als wter cracht die Godt gheeft, op dat in alle dinghen Godt mach gheeert worden doer Iesum Christum, wien toebehoirt die glorie ende heerlijcheyt, tot die eewicheyt der eewicheden Amen.

* 12

⁺Mijn alderliefste en willet v niet laten vreemt gheuen van die hitte, die tot uwen ondersoeck ghesciet, als oft v iet nieus ghesciede,

+ C

13

maer deelachtich wesende van Christus lijden weest blijde, op dat ghy in die openbaringhe van sijnder glorien moecht blijde wesen, v verhueghende.

14

Eest dat ghy bescimpt wort in Christus naem, soo suldi salich wesen. Want dat Godts eere, glorie, ende cracht toebehoort, ende die sijnen gheest is sal op v rusten.

15

Maer niemant van v lieden en lijde als een dootslagher, oft dief, oft quaetspreker, oft begheerder van ander menschen goeden.

16

Maer eest dat hy lijdt als een Christen mensch, die en schame hem niet, ⁺maer hy glorificere Godt in desen naem,

+ D

17

want tes tijt dat het ordeel sal beghinnen van Godts huys. Ende eest datter ierst van ons beghint, wat eynde salder wesen van die ghene die dat Euangelie Godts niet en gheloouen?

18

Ende eest dat die rechtuerdighe nauwelijcs salich en sal worden waer sullen die ongoddelijcke ende die sondaer hen vertoonen.

19

Daer om oock dese die nae Godts wille lijden, die sullen hen zielen beuelen, den ghetrouwen scepper met goede wercken.