Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺DAer om den priesters die onder v lieden sijn bidde ick oock een mede priester ende een ghetuyghe van Christus lijden, die welcke oock ben mede deelachtich der glorien die in den toecomenden tijt gheopenbaert sal worden.

+ A

2

Voedt dat cudde Godts dat onder v lieden is, dat besorghende niet wt bedwanck, maer van selfs nae Godt, noch ooc niet ter saken van scandelijck ghewin, maer willichlijck,

3

noch oock niet als heerscappie hebbende ouer die ondersaten, maer gheworden sijnde een exempel den cudde wt goeder herten.

4

Ende als die prince der herders sal gheopenbaert worden, soo suldi ontfanghen die onuerderffelijcke croone der glorien.

5

Des ghelijcs oock ghy Ionghers weest onderdanich den ouders. Maer alle gader bewijst malcanderen ootmoedicheyt, ⁺want Godt wederstaet den houerdighen, maer den ootmoedighen gheeft hy gratie.

+ B

6

+ Daer om verootmoedicht v onder die machtighe hant Godts, op dat hy v verheffe in den tijt des versoeckens,

7

alle uwe sorchuuldicheyt worpende op hem, want hy heeft sorghe voer v lieden.

8

Weest sober ende waect, want v viant die duyuel gaet om als eenen briesschenden leuw, soeckende dien hy verslinden mocht.

9

⁺Den welcken wederstaet sterck int ghelooue. Wetende dat het selue lijden uwer broederscap ghesciet dat inder werelt is.

+ C

10

Ende Godt van alder gratien die ons gheroepen heeft in sijn eewighe glorie in Christo Iesu, sal ons eenen cleynen tijt lijdende selue volmaken verstercken, ende beuestighen.

11

Hem sij glorie ende heerlijcheyt van die eewicheyt tot die eewicheyt Amen.

* 12

Doer Siluanum den getrouwen broeder heb ick v lieden (als ick voer waer houde) cortelijck ghescreuen, ⁺smeekende, ende betuyghende dat dit is die warachtighe gratie Godts, daer ghy in staet.

+ D

13

Die kercke die in Babilonien is groet v, ende Marcus mijn sone.

14

Groet malcanderen met een heylich cussen. Gratie sij v allen die in Christo Iesu sijt AMEN.

Hier voleyndt dierste Epistel van S. Peeter.