Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .iij. Capittel.

1

⁺DEs ghelijcs sullen oock die vrouwen onderdanich wesen haren mans, op dat die sommighe (eest dat sij den woerde niet en gheloouen) doer die wandelinghe der vrouwen sonder dwoert moghen ghewonnen worden,

+ A

2

aenmerkende v lieder suyuer wandelinghe, inder vreesen.

3

Der welcker cieraet niet en sal wtwendich sijn int vlechten des hairs, oft omhanghen van gout, oft aentrecken van cleederen,

4

maer den mensch des herten die verborghen is, sal verciert sijn, met die ombederffelijcheyt van eenen gherusten, ende sedighen gheest die in Gods aensicht rijck is.

5

Want alsoo vercierden voertijts haerlieden die heyleghe vrouwen hopende in Godt, onderdanich wesende haren eyghenen mannen.

6

Ghelijck Sara Abrahe onderdanich was, noemende hem heere, wiens dochteren ghy sijt, weldoende, ende niet ontsiende eenighe verstooringhe.

7

⁺Die mans sullen desghelijcs wesen mede woonende nae die wetenheyt, als den crancsten vrouwelijcken vaetken eere bewijsende, als oock den mede erfghenamen van die gratie des leuens, op dat v ghebeden niet beledt en worden.

+ B

+ 8

Ende weest alle int ghelooue eendrachtich medelijdende, liefhebbers der broederlijcheyt, bermhertich, sedich, ootmoedich,

9

niet loonende quaet voer quaet, noch vermalendijdinghe voer vermalendijdinghe, maer contrarie ghebenedijdende. Want daer toe sijdi ghy lieden gheroepen, dat ghi die benedictie erffelijck besitten soudt.

10

Want diet dleuen wilt liefhebben, ende goede daghen sien die bedwinghe sijn tonghe van quaet, ende sijn lippen en laet gheen bedroch spreken.

11

Hij wijcke van tquaet ende doe tgoet, hy versoecke den vrede, ende volghe dien.

12

Want die ooghen des Heeren sijn op die rechtuerdighe, ende sijn ooren sijn tot hen ghebeden. ⁺Maer daensicht des Heeren is op die quaetdonders.

+ C

13

Ende wie eest die v hinderen mach, eest dat ghy nauolghers sijt van tghene dat goet is.

14

Maer eest dat ghy oock iet lijdet om die rechtuerdicheyt, soo sijdi salich. Maer hen vreese en ontsiet niet, ende en wort niet verslaghen.

15

Maer den Heere Christum heylicht in v herten. * Altijt bereedt om reden te gheuen allen den ghenen die van v reden eysschen, van die hope in die in v lieden is.

16

Maer met sedicheyt ende vreese hebbende een goede conscientie, op dat die ghene die v goede wandelinghe in Chriso tonrecht lasteren moghen bescaemt worden int tghene daer sij v af lasteren.

17

Want het is beter dat ghy weldoende (eest dat den wille Godts wilt) lijdet, dan quaetdoende.

+ 18

Want Christus is eens voer onse sonden ghestoruen, rechtuerdich voer die onrechtuerdighe, op dat hy ons soude Gode offeren, ⁺ghedoot voerwaer nae den vleesche, maer leuende ghemaect nae den gheest.

+ D

19

Inden welcken hy ooc in den gheest comende ghepreect heeft den ghenen die inden kerker waren,

20

die somtijts ongheloouich gheweest hadden, als sij Godts verduldicheyt verwachten in die daghen van Noe, als die arcke ghetimmert worde, in die welcke een luttel, dat is acht zielen, behouden sijn gheweest doert water.

21

Alsoo behoudt v lieden nu oock het doopsel van ghelijcker manieren, niet het aflegghen van die vuylicheyt des vleeschs, maer het ondervraghen van een goede conscientie tot Godt, doer die verrijsenisse Iesu Christi.

* 22

Die daer is aen Gods rechte hant, verslindende die doot, om dat wy des eewichs leuens erfghenamen souden sijn, hy is opghevaren in den hemel, die enghelen ende mach-

[p. *907]

ten ende crachten, hem onderworpen sijnde.