Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺VVaer af sijn der strijden ende kijuagien onder v lieden? En is dat niet hier af, wt uwe wellusten die in v leden strijden?

+ A

2

Ghy begheert, ende en hebbes niet, ghi slaet doot, ende benijdt ende ghy en moghet niet vercrijghen, ghy kijft ende strijdt, ende en hebbet niet, daerom want ghy niet en biddet.

3

Ghy bidt, ende en ontfanght niet, om dat ghi qualijck bidt, te weten om dat ghijt in uwe wellusten verdoen soudet.

4

Ghy ouerspeelders en weet ghi niet dat die vrintscap deser werelt Godts viantschap is? ⁺Daerom soo wie deser werelt vrint wilt sijn, die wort Godts viant ghemaect,

+ B

5

Meyndy dat die schriftuere ydelijck seydt. Tot nijdicheyt begheert die gheest die in v lieden is?

6

Maer hy gheeft meerder gratie, Daerom seyt sij. Godt wederstaet den houerdighen, ende gheeft gratie den ootmoedighen.

7

+ Daerom weest Gode onderdanich, maer wederstaet den duyuel, ende hy sal van v vlieden,

8

Ghenaket Gode, ende hy sal v ghenaken. Suyuert die handen o ghi sondaers, ende maect puer die herten ghy die dobbel van ghemoede sijt.

9

⁺Weest allendich ende maect rouwe, ende weent, laet v lachen in een droeffenisse verkeert worden, ende v blijscap in trueringhe,

+ C

10

Verootmoedicht v voor daenschijn des Heeren, ende hy sal v verheffen. *

11

En wilt malcanderen niet lasteren achter rugghe mijn broeder, Die sijnen broeder achter rugghe lastert oft sijnen broeder ordeelt, die lastert die wet, ende ordeelt die wet, Eest dat ghi die wet ordeelt, soo en sijdi gheen doender der wet, maer een rechter,

12

want daer is een wetgheuer ende rechter, die verdoemen mach ende verlossen, Maer wie sijt ghy die uwen naesten ordeelt?

13

+ ⁺Siet ghy die nv segt. Heden oft morghen sullen wij gaen in die stadt, ende wij sullen daer emmer een iaer blijuen, ende wij sullen comenscap doen, ende winninghe doen

+ D

14

(die niet en weet wat morghen wesen sal)

15

want wat is v lieder leuen? Tis eenen domp die een luttel tijts ghesien wort, ende daer nae sal hy verdwijnen, voor tghene dat ghy segghen soudt, Eest dat die Heere wilt, ende eest dat wij leuen, soo sullen wij dit oft dat doen,

16

Maer nv verheft ghy v in uwe houerdien, Alle sulck verhueghen is arch,

17

Daerom den ghenen die tgoet doen can, ende niet en doet, dien eest sonde. *