Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺VVel aen nv ghy rijcke, weent huylende in uwe allendicheden, die v toecomen sullen

+ A

2

v rijckdommen sijn verrot, ende v cleederen sijn van die motten gheten.

3

V gout ende siluer is verroest gheworden, ende haren roest sal v lieden tot een ghetuyghenis wesen, ende tsal v vleesch eten als een vier Ghy hebt voor v lieden die gramscap tot eenen schat vergadert teghen die wterste daghen.

4

Siet den loon der wercluyden die v lantscappen ghemaeyt hebben die van v lieden bedrieghelijc onthouden is, dien roept ende den roep van dien is ghecomen in die ooren des Heeren der heyrscharen.

5

Ghy hebt ghebrast op die eerde, ende in uwe ouerdadicheden hebdi v herten opgheuoedt teghen den dach der doodinghen.

6

Ghi hebt aenghebracht ende ghedoot den rechtuerdigen, ende hi en heeft v lieden niet wederstaen.

7

+ ⁺Daerom broeders weest verduldich tot die toecoemst des Heeren, Siet die ackerman verwacht die costelijcke vrucht der eerden, verduldichlijck lijdende tot dat hy ontfanghe den vroeghen ende spaden reghen.

+ B

[p. *905]

8

Weest ghy oock verduldich, ende versterct v herten, want die toecoemst des Heeren sal naken.

9

Broeders en wilt niet versuchten teghen malcanderen, op dat ghy niet geordeelt en wort. Siet die richter staet voor die doere,

10

Broeders neemt tot een exempel des arbeyts ende verduldicheyt die propheten die ghesproken hebben inden naem des Heeren. *

11

⁺Siet wij achtense salich die verdraghen hebben, Die verduldicheyt van Iob hebdi ghehoort, ende des Heeren eynde hebdi ghesien, want die Heere is bermhertich ende ghenade doende,

+ C

12

Maer voor al mijn broeders en wilt niet sweren, noch by den hemel, noch by die eerde, noch gheenen anderen eedt, maer laet v woort wesen iae dat iae is, ende neen dat neen is, op dat ghy onder doordeel niet en valt,

13

Isser iemant van v lieden bedroeft? die bidde Isser iemant wel gemoet? die singhe,

14

Isser iemant onder v lieden sieck? die hale die priesters der kercken, ende laet die ouer hem bidden, saluende hem met olien, in den naem des Heeren,

15

ende tghebedt des gheloofs sal den siecken ghenesen, ende die Heere sal hem verlichten ende eest dat hy in sonden is, die sullen hem vergheuen worden.

+ 16

⁺Daerom biecht malcanderen v sonden ende bidt voor malcanderen, dat ghi moecht salich worden, want seer veel vermach het ghestadich ghebedt vanden rechtuerdighen,

+ D

17

Elias was een lijdelijc mensch onser ghelijck, ende door een ghebedt heeft hy ghebeden dat op die eerde niet reghenen en soude, ende ten heeft niet ghereghent binnen drij iaren, ende ses maenden,

18

Ende hy heeft wederom ghebeden ende den hemel heeft reghen ghegheuen, ende die eerde heeft haer vrucht ghegheuen.

19

Mijn broeders eest dat iemant van v lieden doelt van die waerheyt, ende dat hem iemant bekeert,

20

die moet weten, dat soo wie den sondaer doet bekeeren van die dolinghe sijns weechs, die sal sijn ziele verlossen van die doot, ende hy bedect die menichte der sonden.

* Hier voleynt die Epistel van sint Iacob.