Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺EN wilt niet veel meesters worden mijn broeders, wetende dat ghy meerder ordeel crijcht

+ A

2

want wij misdoen alle in veel dinghen. Eest dat iemant metten woorde niet en misdoet dits een volmaect man, hy mach oock met eenen toom tgheheel lichaem omleyden,

3

Maer eest dat wi den peerden die toomen inden muyl steken, om die ons te ghewilligen soo wenden wij oock al rontom hen lichamen,

4

Ende siet die scepen hoe wel dat sij groot sijn ende van stercken winden ghedreuen worden, nochtans worden sij omgheuoert met een cleyn roer, waer dat het ghewelt des regeerders wilt,

5

⁺Alsoo is die tonghe oock een cleyn let, ende het beroemt groote dinghen. Siet hoe grooten bosch dat een cleyn vier ontsteect,

+ B

6

Ende die tonghe is een vier een werelt der boosheyt, Die tonghe wort ghestelt in onse leden, die welcke besmet het gheheel lichaem, ende si ontsteect dat radt van onser gheboorten, ontsteken sijnde van die helle,

7

want alle natuere van beesten ende voghelen, ende serpenten, ende der ander dieren, worden ghetemt, ende sijn ghetemt gheweest van die menschelijcke natuere,

8

maer die tonghe en mach gheen mensch temmen. Tis een ongherustich quaet, vol dootelijcs fenijns,

9

⁺Door haer ghebenedijden wij Godt ende den vader, ende met haer vermalendijden wij die menschen die nae Gods ghelijckenisse ghemaect sijn,

+ C

10

wt den seluen mont coemt voorts die ghebenedijdinghe ende vermalendijdinge, Mijn broeders dese dinghen en moeten alsoo niet ghescieden.

11

Vloeyt een fonteyne wt eenen gate, suet ende bitter water?

12

Mijn broeders mach eenen vijgheboom wijndruyuen voorts brenghen, oft eenen wijnstruyck vijghen? Also en mach ooc gheen ghesouten water suet water maken,

13

Wie isser wijs, ende gheleert onder v lieden? die toone wt sijn goede wandelinghe sijn werc in die saechtmoedicheyt der wijsheyt.

14

+ ⁺Maer eest dat ghy bitteren nijdt hebt, ende datter strijden sijn in v herten, soo en wilt niet glorieren, ende loghenachtich sijn teghen die waerheyt,

+ D

15

want dit en es gheen wijsheyt van bouen nederdalende, maer eertsche, sinlijcke ende duyuelsche,

16

want daer nijdt ende strijdt is, daer is onghestadicheyt, ende alle quaet werc,

17

Maer wijsheyt die van bouen is die is ten iersten eerbaer, daer nae vreedtsaem, sedich, beradelijck, een gheuoelen hebbende metten goeden, vol bermherticheden, ende goede vruchten, niet ordeelende, sonder gheueynstheyt,

18

ende die vrucht der rechtuerdicheyt wort in vrede ghesaeyt den ghenen die vrede maken.