Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

+ 1

⁺MYn broeders, en wilt het ghelooue van die glorie ons Heeren Iesu Christi niet hebben int wtnemen der persoonen,

+ A

2

Want eest dat in uwe vergaderinghe coemt een man hebbende eenen gulden rinck, in een wit blinckende cleet, ende datter oock incoemt een arm mensch met een snoode habijt,

3

ende dat ghy aenmerct op dien die ghecleedt is met dat seer eerlijck cleedt, ende segghet tot hem. Sidt ghy hier wel, maer segt totten armen, Staet ghi daer, oft sidt onder dat banxken mijnder voeten,

4

en ordeelt ghi lieden dan niet by v seluen, ende sijt gheworden rechters der ongherechtigher ghedachten?

5

Hoort mijn alderliefste broeders. En heeft Godt die arme menschen niet vercoren in dese werelt, rijck int ghelooue, ende erfghenamen des rijcks, dwelck Godt beloeft heeft den ghenen die hem liefhebben?

6

Maer ghy lieden hebt den armen mensch onteert, ⁺En verdrucken v die rijcke luyden niet door machticheyt, en trecken sij v niet tot die vierscaren?

+ B

7

En blasphemeren sij niet den goeden naem die ouer v lieden aengheroepen is?

8

Eest ooc dat ghy die coninclijcke wet volbrengt nae die scriftueren. Ghi sult uwen naesten liefhebben als v seluen, soo doedy wel,

9

maer eest dat ghy die persoonen wtneemt, soo doedi sonde, wordende ghestraft van die wet als ouertreders,

10

Maer soo wie alle die wet onderhoudt, ende misdoet int eene, die is schuldich gheworden van alle,

11

Want wie gheseyt heeft. Ghy en sult gheen ouerspel doen, die heeft oock gheseyt. Ghy en sult niet dootslaen, Ende eest dat ghi gheen ouerspel en doet, maer dootslaet, soo sijdi gheworden een ouertreder der wet

12

Alsoo spreect, ende alsoo doet, als die beghint gheordeelt te worden door die wet der vrijcheyt,

13

Want recht ordeel sonder bermherticheyt sal hem ghescieden, die gheen bermherticheyt ghedaen en heeft, ⁺Maer die bermherticheyt gaet te bouen het ordeel.

+ C

* 14

+ Wat salt baten mijn broeders eest dat iemant seyt dat hy tghelooue heeft, ende die wercken niet en heeft? Mach dat ghelooue hem salich maken?

15

Ende eest dat een broeder oft suster naect sijn, ende ghebrec lijden van daghelijcschen nootdurft,

16

ende dattet iemant van v lieden tot hen segghe. Gaet in vreden wort werm, ende wert versaet, maer dat ghy hen niet en gheeft dat den lichame nootelijck is, wat salt helpen?

17

Alsoo oock het ghelooue, eest dat gheen wercken en heeft, soo eest doot in sij seluen. *

18

Maer iemant seyt. Ghy hebbet ghelooue, ende ick heb die wercken, toont my v ghelooue sonder wercken ende ick sal v wt die wercken mijn ghelooue toonen,

[p. *904]

19

⁺Ghy ghelooft datter een Godt is. Ghy doet wel, die duyuelen gheloouent oock ende sij verscricken hen,

+ D

20

Maer wilde ghy ydel mensch weten dat het ghelooue sonder werck ydel is?

21

Abraham ons vader en is hy wt die wercken niet gerechtuerdicht offerende Isaac sijnen sone opden outaer?

22

Siedi wel dat het ghelooue mede wracht met sijnen wercken ende dat wt den wercken het gelooue volmaect is geweest?

23

Ende die scriftuere is volbracht seggende. Abraham heeft Gode gelooft, ende tis hem gherekent ter rechtuerdicheyt, ende hy is Godts vrient ghenoemt gheweest.

24

Siet ghy wel dat een mensch wt die wercken gherechtuerdicht wort, ende niet wten ghelooue alleen?

25

Desghelijcs oock Rahab die ghemeyn weerdinne, en is sij niet wt die wercken gherechtuerdicht ontfanghende die boden, ende die door eenen anderen wech wtleydende?

26

Want ghelijck een lichaem sonder gheest doot is, alsoo is het ghelooue sonder wercken oock doot.