Den gheheelen Bybel, Inhoudende het oude ende nieuwe Testament (Leuvense bijbel 1548)

⁺Dat ierste Capittel.

+ A

1

IACOBUS een dienaer Godts ende ons Heeren Iesu Christi, den twaelf gheslachten die in die verstroeytheyt sijn salicheyt

2

Mijn broeders achtet te wesen alle blijscap als ghy sult gheuallen sijn in versceyden becoringen

3

wetende dat die proeuinghe ws gheloofs verduldicheyt werct,

4

Ende die verduldicheyt hebbe een volmaect werck, op dat ghy moecht wesen volmaect ende gheheel, nerghens in ghebrekende.

5

Maer eest dat iemant van v lieden wijsheyt behoeft, die beghere die van Gode, die allen menschen gheeft oueruloedelijck, ende niet en verwijt, ende die sal hem ghegheuen worden,

6

Maer hy bidde int ghelooue, niet twijfelende, want die twijfelt, die is ghelijck die bare vander zee, die vanden wint gheroert wort ende ommeghedreuen,

7

daerom die mensch en laet hem niet duncken dat hy iet ontfanghen sal vanden Heere.

8

⁺Een man dobbel van ghemoede is onghestadich in alle sijn weghen,

+ B

9

Maer een ootmoedich broeder die glorieere in sijn verheffinghe,

10

ende die rijcke in sijn vernederinghe, want ghelijc een bloeme des hoys sal hy verghaen,

11

want die sonne is opghestaen met hitten, ende die heeft het hoy verdorret, ende sijn bloeme is afgheuallen, ende die schoonheyt haerder ghedaenten is verghaen, alsoo sal die rijcke oock verdwijnen in sijn weghen.

12

Salich is die man die de becoringhe verdraecht, want als hy sal gheproeft sijn, soo sal hy ontfanghen die croone des leuens, die God beloeft heeft den ghenen die hem liefhebben.

13

Niemant en segghe als hy ghetempteert wort, dat hy van Gode ghetempteert wort, want Godt en is gheen tempteerder tot quaet, ende hy en tempteert niemant,

14

Maer een ieghelijck wort ghetempteert van sijn begheerlijcheyt afghetrocken, ende aengheloct,

15

Daer nae als die begheerlijcheyt ontfanghen heeft, soo baert sij die sonde, ende die sonde als sij volbracht is, brengt voorts die doot.

16

⁺Daerom en wilt niet dolen mijn alderliefste broeders. *

+ C

17

Alle die beste gaue ende alle volmaecte ghifte is van bouen nederdalende vanden vader der lichten, by den welcken gheen veranderinghe en is, oft ouerlommeringe der verkeeringhen,

18

Vrijwillichlijc heeft hy ons voorts bracht door dwoort der waerheyt om dat wij sijn souden eenighe ierstelinghen sijns scepsels,

19

Ghy wetet mijn alderliefste broeders. Maer alle mensch sij rasch om te hooren, maer traech om te spreken, ende traech tot gramscap,

20

want die gramscap eens mans en werct die rechtuerdicheyt Godts niet,

21

Daerom wech worpende alle onsuyuerheyt, ende oueruloedicheyt der quaetheyt, in saechtmoedicheyt ontfanct dat ingheplant woort, dwelck v ziele mach salich maken.

* 22

+ ⁺Maer weest doenders des woorts, ende niet alleen hoorders, v seluen bedrieghende,

+ D

23

Want isser iemant een hoorder des woorts ende gheen doender, dese sal gheleken worden den man die het aensicht sijnder ghebuerten aensiet in eenen spieghel,

24

want hy heeft sij seluen aensien, ende is wech ghegaen, ende ter stont heeft hy vergheten hoedanich dat hy gheweest heeft,

25

Maer soo wie aenmerct in die wet der volmaecter vrijcheyt, ende daer in blijft, niet gheworden sijnde een verghetelijck hoorder, maer een doender des wercs, dese sal salich wesen in sijn werck

26

Maer eest dat iemant meynt dat hy Godsdienstich is, niet bedwinghende sijn tonghe, maer verleydende sijn herte, deses Godtsdienst is ydel.

27

Den suyueren Godtsdienst by Godt ende den vader is dese, Te besoecken die weesen ende weduwen, in hen tribulatien ende hem seluen ombesmedt te houden van deser werelt. *