Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺DAerom wij oock hebbende omtrent ons soo groote wolcke der ghetuyghen, aflegghende alle last, ende alle sonde ons omstaende, laet ons door verduldicheyt loopen tot den strijdt die ons voorghesteldt is,

+ A

2

aensiende opden principalen wercker ende voleynder des geloofs Iesum die welcke hebbende voor hem ghestelt die blijscap, heeft het cruys verdraghen, versmadende die bescaemtheyt ende sidt ter rechter hant Godts.

3

+ Want ghedenct sijns die sulck wedersegghen teghen hem seluen van die sondaers verdraghen heeft, op dat ghy niet vermoeyt en wort met uwen ghemoede verflauwende,

4

⁺want ghy en hebt noch totten bloede niet wederstaen, teghen die sonde strijdende,

+ B

5

ende ghy hebt vergheten die vertroostinghe die tot v lieden als tot kinderen spreect segghende. Mijn sone en wilt niet verachten die castijnghe des Heeren, noch en latet v niet verdrieten als ghy van hem ghestraft wort,

6

Want wien die Heere liefheeft, dien castijt hy, ende hy gheesselt elck kint dat hy ontfanct,

7

In die castijnghe volherdet, als den kinderen soo biedt Godt sij seluen v lieden, want wat kint isser dat die vader niet en castijt?

8

Eest dat ghy buyten die castijnghe sijt, der welcker sij alle deelachtich sijn gheworden soo sijdy dan bastaerden ende gheen wettighe kinderen,

9

⁺Voorts soo hebben wij voorwaer vaders ons vleeschs tot onderwijsers ghehadt, ende wij ontsaghen die, en sullen wi niet veel te meer onderdanich sijn den vader der gheesten ende leuen?

+ C

* 10

Ende die leerden ons voorwaer op eenen tijt van luttel daghen nae haren wille, maer dese tot dat ghene

[p. *902]

dat orboerlijck is om te ontfanghen sijn heylighinge.

11

Maer alle castijnghe en die teghenwoordicheyt en scijnt niet genoechelijc te wesen, maer droeuich, maer namaels sal sij een seer gheruste vrucht der rechtuerdicheyt weder gheuen den ghenen die door haer gheoeffent sijn,

12

⁺Daerom richt op die slappe handen, ende lamme knyen,

+ D

13

ende maect rechte ganghen met uwen voeten, op datter iemant crepel gaende niet en dwale, mae laet hem meer genesen worden.

14

Volcht den vrede met alle menschen ende heylicheyt, waer sonder dat niemant Godt sien en sal,

15

toesiende datter niemant der gratien Godts en ontbreke, op datter gheen wortel der bitterheyt opwaerts spruytende beledt en doe, ende datter vele door die besmet worden.

16

Datter niemant een hoereerder en sij oft ongheestelijc ghelijc Esau, die om een spijse sijn recht der ierster gheboorten vercocht heeft,

17

want ghy sult weten, hoe dat hy namaels begheerende die benedictie te beeruen, verworpen is gheweest, ⁺want hy en vant gheen plaetse der penitencien, hoe wel dat hy die met tranen versocht hadde,

+ E

18

Want ghy en sijt niet ghegaen totten rakelijcken berch, ende totten viere daermen aencomen mach, ende totten stormende wint, ende duysterheyt, ende onweder,

19

ende tgheluyt der basoenen ende die stemme der woorden, die welcke die ghene diese ghehoort hebben, weygherden hen dat hen dwoort niet en soude ghedaen worden

20

(Want sij en verdroegen niet tghene datter gheseyt worde, Ende waert dat een beeste den berch raecte, die soude ghesteent worden,

21

Ende also veruaerlijc waert datter ghesien worde, Moyses heeft gheseyt. Ick ben verscrict gheworden, ende heel beuende)

22

⁺Maer ghy sijt ghegaen tot den berch Sion ende die stadt des leuende Godts tot die hemelsche Ierusalem, ende totter menichten van veel duysent Enghelen,

+ F

23

ende tot die kercke der ierstelinghen die bescreuen sijn in die hemelen, ende tot God den rechter van al, ende tot die gheesten der volmaecter rechtuerdigher,

24

ende tot des nieuwen testaments middelaer Iesum ende tot die bespraeyinghe des bloets, beter sprekende dan Abels bloet.

25

Siet toe dat ghy den ghenen die spreect niet en veronweerdicht, Want eest sake dat sij niet ontuloden en sijn die hem veronweerdicht hebben die opder eerden sprack, ⁺veel te min wij die verachten den ghenen die ons van die hemelen toespreect,

+ G

26

wiens stemme doen die eerde beruerde, maer nv beloeft hy segghende. Noch eens ende ick sal berueren niet alleen die eerde, maer oock den hemel.

27

Maer dat hy seydt noch eens, soo verclaert hi die veranderinghe der wandelbaer dinghen als die ghemaect sijn, op dat die blijuen moghen die onwandeldaer sijn.

28

+ Hierom het omberuerlijck rijck ontfanghende hebben wij die gratie, door die welcke wij Gode behaghende dienen souden, met vreese ende eerweerdicheyt,

29

Want voorwaer ons Godt is een verterende vier.