Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺MAer het ghelooue is een vasticheyt der dinghen die te hopen sijn, een seker bewijs der dinghen die niet ghesien en worden,

+ A

2

Want hier door hebben die ouders ghetuyghenis vercreghen,

3

Door tghelooue verstaen wij, dat die tijden deser werelt bequamelijc ghescict sijn door dwoort Godts, op dat wt die onsienlijcke dinghen ghemaect souden worden die sienlijcke.

4

Doort ghelooue heeft Abel Gode een meerder slachofferande gheoffert dan Cain, door die welcke hy een ghetuyghenis vercreghen heeft dat hy rechtuerdich was, als Godt ghetuyghenis gheuende was van sijnen ghiften, ende daer door spreect hy noch al is hy doodt,

5

Doort ghelooue is Enoch wechgheuoert dat hy die doot niet sien en soude, ende hi en worde niet gheuonden, want God heeft hem wechgheuoert, want voor die veruoeringhe heeft hi ghetuygenis ghehadt, dat hy Gode behaecht hadde,

6

Maer sonder ghelooue eest onmoghelijc Gode te

[p. *901]

behaghen, ⁺Want soo wie tot Gode coemt die moet gheloouen dat hy is, ende dat hy den ghenen die hem soecken een vergelder is.

+ B

7

Door tghelooue heeft Noe nae dat hy een antwoorde ontfanghen hadde van die dinghen die noch niet ghesien en worden vreesende een arcke bereyt ter salicheyt van sijnen huyse, door die welcke hy die werelt verdoemt heeft, ende is een erfghenaem ghestelt der rechtuerdicheyt die wten ghelooue is,

8

Door tghelooue heeft hy die Abraham ghenoemt wort, onderdanich gheweest om wt te gaen ter plaetsen die hy ontfanghen soude tot een erffenisse, ende hy is wtghegaen, niet wetende waer henen dat hy ginc.

9

Doort ghelooue heeft hi ghewoont int lant der beloften, als in een vreemt landt, woonende in hutten met Isaac ende Iacob mede erfghenamen der seluer beloften,

10

want hy verwachte een stadt die fundamenten hadde der welcker constich makere ende sceppere Godt is,

11

⁺Door tghelooue heeft die onvruchtbaer Sara cracht ontfanghen des saets, oock ouer den tijt des ouderdoms, want sij gheloofde dat hy ghetrouwe was diet beloeft hadde.

+ C

12

Daerom sijnder ooc gheboren van eenen man (ende dien verstoruen) als sterren des hemels in menichte, ende ghelijck dat sandt dwelck aen de cant der zee is ontellijck.

13

Nae tghelooue sijn alle dese ghestoruen, niet ontfanghen hebbende die beloften, maer van verre die aensiende ende groetende, ende belijdende dat sij pelgrims ende vreemdelinghen sijn op die eerde,

14

Want die dese dinghen segghen die bewijsen dat sij hen landt soecken,

15

Ende waert dat sij emmer des lants ghedachtich hadden gheweest daer sij wtghegaen waren, soo hadden sij voorwaer tijt om weder te keeren,

16

⁺maer nv begheeren sij een beter lant dat is een hemelsch lant, Daerom en scaemt hem God niet, haerlieder Godt ghenoemt te worden, want hy heeft hen een stadt bereydt.

+ D

17

Door tghelooue heeft Abraham Isaac gheoffert doen hy beproeft worde, ende hy offerde sijnen eenighen gheboren sone die de beloften ontfanghen hadde

18

(totten welcke gheseyt is) In Isaac sal v dat saet ghenoemt worden,

19

voorwaer houdende dat Godt machtich was oock van die dooden te verwecken, waerom heeft hy dien tot een ghelijckenisse wederom ontfanghen.

20

Door tghelooue heeft Isaac Iacob ende Esau ghebenedijt van toecomende dinghen.

21

Door tghelooue heeft Iacob steruende een ieghelijc van Iosephs kinderen besonder ghebenedijt ende heeft aenghebeden dat wtersten van sijnder roeden.

22

⁺Door tghelooue heeft Ioseph steruende vermaen ghedaen van dat reysen der kinderen van Israel ende heeft gheboden van sijnen ghebeenten,

+ E

23

Door tghelooue Moyses gheboren sijnde is gheborghen gheweest drij maenden van sijnen ouders, om dat sij ghesien hadden dattet een fraey kindeken was, ende sij en hebben des conincks ghebodt niet ontsien,

24

Door tghelooue heeft Moyses doen hy groot gheworden was gheloochent dat hy Pharaos dochters sone was,

25

meer verkiesende ghepijnicht te worden met Godts volc, dan der tijtelijcker sonde ghenoechte te hebben,

26

achtende het verwijt Christi meerder rijckdommen te wesen, dan den schat van Egipten want hy sach op die vergheldinghe,

27

⁺Door tghelooue heeft hy Egipten ghelaten, niet ontsiende die hoochmoedicheyt des conincks, want den onsienlijcken heeft hy als siende verdraghen,

+ F

28

Door tghelooue heeft hy Paesschen feestelijck ghehouden, ende die bloetstortinghe, op dat die ghene die dierste gheborene verdorf hen niet raken en soude.

29

Doort ghelooue sijn sij door die roode zee gheghaen als door dat drooghe lant, dwelck als die Egiptenaren ondersocht hadden, werden sij verslonden.

30

Door tghelooue sijn die mueren van Iericho neder gheuallen door den omganck van seuen daghen.

31

Door tghelooue en is Raab die ghemeyn weerdinne niet verloren ghegaen metten ongheloouighen, ontfanghende die bespieders met vreden,

32

Ende wat sal ick noch segghen? Want den tijt sal my ontbreken vertellende van Gedeon, Barac, Samson, Iephte, Dauid, Samuel, ende van die propheten,

33

⁺die doort ghelooue conincrijcken verwonnen hebben, ghewracht hebben die rechtuerdicheyt vercreghen hebben die beloften, ghesloten die muylen der leeuwen,

+ G

34

wtghebluscht die cracht des viers, die ontuloden sijn dat scerpte des sweerts, crachtich sijn gheworden van cranckheyt, sterck gheworden inden strijdt, ghekeert hebben die heyrleghers der vreemden,

35

die vrouwen hebben hen dooden ontfanghen van die verrijsenisse, Maer die andere sijn wtgherect gheweest niet ontfanghende eenighe verlossinghe, op dat sij een beter verrijsenisse vinden souden,

36

Maer die andere hebben bespottinghen ende slaghen gheproeft, daer toe oock banden ende kerkeren,

37

sij sijn ghesteent gheweest, van een ghehouwen gheweest, ghetempteert gheweest, ende door verslaen des sweerts ghestoruen, sij hebben ommeghegaen in scaepspelsen, in gheyten vellen, ghebrec lijdende, benaut, ghepijnicht

38

der welcker die werelt niet weerdich en was, in woeste plaetsen dolende op berghen, ende in speluncken, ende in die holen der eerden,

39

Ende alle dese door tghetuyghenis des gheloofs gheproeft sijnde en hebben die belofte niet ontfanghen,

40

midtsdien dat Godt wat beters voor ons voorsiende was, dat sij sonder ons niet en souden volmaect worden.