Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺VVant die wet hebbende een scaduwe der toe comender goeden, niet het warachtich beelt der dinghen, en mach nemmermeer volcomen maken die ghene die daer toegaen, met die selue slachofferanden die sij sonder ophouden offeren tot allen iaren,

+ A

2

want anders soo souden die opghehouden hebben van gheoffert te worden, om dat die dienaers eens ghesuyuert sijnde gheen conscientie der sonder voorts meer en souden hebben,

3

Maer hier inne wort een ghedenckenisse der sonden tot elcken iare ghehouden,

4

want het is onmoghelijck dat door der stieren ende bocken bloet die sonden souden afghenomen worden,

5

Daerom hy in die werelt comende seyt. ⁺Gheen slachofferande ende ghifte en hebdi ghewilt, maer ghy hebt my een lichaem bequamelijc toegheuoecht,

+ B

6

die heelbrantofferen, ende die sondofferen en hebben v niet behaecht,

7

Doen heb ick gheseyt. Siet ick come, int beghinsel des boecs is van my ghescreuen dat ick Godt uwen wille doen soude,

8

Bouen segghende. Dat ghy die slachofferanden ende sacrificien ende heelbrantofferen ende sondofferen niet ghewilt en hebt, ende dat v oock niet behaechten hebben, die nae die wet gheoffert worden,

9

doen heb ick gheseyt. Siet ick come, om dat ick Godt uwen wille doen soude, daer neemt hy dierste wech om dat nauolghende in te setten,

10

In welcken wille wij gheheylicht sijn, door die offerande van dlichaem Iesu Christi eens,

11

⁺Ende voorwaer elck priester is teghenwoordich alle daghe dienende, ende die selue slachofferanden dicmael offerende, die nemmermeer die sonden en moghen afnemen,

+ C

12

Maer dese een slachofferande offerende voor die sonden, sidt inder eewicheyt aen die rechte hant Gods,

13

voortaen verwachtende tot dat sijn vianden ghestelt sullen worden tot een scabelle sijnder voeten,

14

want door een offerande heeft hy inder eewicheyt volmaect die gheheylichde.

15

Ende die heylighe gheest betuyghet ons ooc, want nae dat hy gheseyt heeft.

16

Ende dit is het testament dat ick tot henlieden betuyghen sal nae die daghen, seyt die Heere. Gheuende mijn wet in hen herten, ende in hen gedachten sal icse scrijuen,

17

⁺ende haerder sonden ende ongerechticheden en sal ick nv niet meer ghedencken,

+ D

18

Ende waer verghiffenisse is van dese, daer en is voorts gheen offerande meer voor die sonde,

19

Daerom broeders hebbende betrouwen inden inganc der heylighen doort bloet Christi

20

door den nieuwen ende leuenden wech welcken hy ons ierstmael voorghewandelt heeft doort voorhancsel, dat is, sijn vleesch,

21

hebbende oock den grooten priester ouer thuys Gods,

22

laet ons daer toegaen met een warachtich herte in die volheyt des gheest hebbende die herten bespraeyt van een quade conscientie, ende die lichamen ghewasschen met suyueren water,

23

⁺laet ons houden die onbeweghelijcke belijdinghe onser hopen (want hy is ghetrouwe diet beloeft heeft)

+ E

24

ende laet ons malcanderen aenmercken tot verweckinghe der liefden, ende der goeder wercken,

25

niet verlatende onse vergaderinghe, ghelijc die sommighe ghewoonlijck sijn maer troostende, ende dat soo veel te meer als ghy siet den dach aencomende.

26

Want als wij al willens sondighen, nae dat wij ontfanghen hebben die kennisse der waerheyt, soo en wort daer voor die sonden nv gheen slachofferande meer achterghelaten,

27

maer een veruaerlijc verwachten des ordeels, ende een crachtighe wreetheyt des viers, welck verslinden sal die vianden,

28

⁺Soo wie Moyses wet breect die sterft sonder eenighe ontferminghe door twee oft drij ghetuyghen,

+ F

29

hoe veel te meer quader pijnen meyndi dat sulc lijden sal, die den sone Gods vertreden heeft, ende het bloet des testaments voor onsuyuer ghehouden, waer in dat hy gheheylicht is, ende den gheest der gratien versmaetheyt aenghedaen heeft?

30

Want wi weten wie datter gheseyt heeft. Gheeft my die wrake, ick salt verghelden, Ende wederom, want die Heere sal sijn volc ordeelen.

31

Het is grouwelijc te vallen in die handen des leuende Gods,

32

Maer weest ghedachtich der voorleder daghen, in die welcke ghy verlicht sijne eenen grooten strijdt des lijdens hebt verdraghen,

33

eens deels voorwaer als ghy door versmaetheden ende tribulatien een besiensel sijt gheworden, ⁺ende eens deels als ghy medeghesellen sijt gheworden der gheender die alsoo wandelen,

+ G

34

Want ghi hebt oock metten gheuanghenen medelijden ghehadt, ende die beroouinghe van uwen goeden hebdi met blijscap ontfanghen, wetende dat ghy noch een beter ende blijuende goet hebt inden hemel.

35

Daerom en wilt v betrouwen niet verliesen, die een groot vergheldinghe heeft,

36

want verduldicheyt is v van noode, op dat ghy den wille Gods doende, moecht vercrijghen die belofte

37

Want noch een luttel ende een cleyn luttelken, ende die toecomende is, sal comen, ende hy en sal niet vertoeuen,

38

maer mijn rechtuerdighe leeft wten gheloove, maer eest dat hy hem seluen onttrect, soo en sal hy mijnder zielen niet behaghen,

39

Maer wij en sijn gheen kinderen des aftreckens ter verdoemenissen, maer des gheloofs tot vercrijghinghe der zielen.