Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺HEt ierste testament hadder voorwaer te voren sijn rechtuerdichmakinghen des diensts, ende een wtwendighe heylicheyt.

+ A

+ 2

Want het tabernakel is ten iersten ghemaect, waer in dat waren die candelaers, ende die tafel, ende die voorlegghinge der brooden die heylich ghenoemt wort.

3

Maer na dat tweetste voorhancsel was het tabernakel dwelc ghenoemt wort theylich der heylighen,

4

hebbende het gulden wieroockvat, ende die arcke des testaments, rontsomme ouerdect van allen sijden met goude, waer in was die gulden cruycke houdende het manna ende Aarons roede die bladeren voortbracht hadde, ende die tafelen des testaments,

5

ende ouer die waren die Cherubims der glorien ouerlommerende den stoel der ghenaden, ⁺waer af dat nv niet en is te segghen van elcken besondere,

+ B

6

Maer als dese dinghen aldus bereydt waren, soo ghinghen die priesters altijt in dat ierste tabernakel, die diensten der sacrificien voldoende,

7

maer int tweede ghinc alleene die ouerste priester eens tiaers, niet sonder bloet, dwelck hy offert voor sijn, ende des volcs onwetenheyt

8

Den heylighen gheest dit te kennen gheuende, dat den wech der heylighen noch niet gheopenbaert en was, te wijle dat het ierste tabernakel noch sijnen staet hadde,

9

dwelck een ghelijckenisse is van desen teghenwoordighen tijt, waer nae gheoffert worden gauen, ende slachofferanden die nae die conscientie den ghenen die dient niet volcomen maken en connen,

10

⁺alleenlijck in spijsen ende in drancken, ende versceyden manieren van wasschen, ende rechtuerdicheden des vleeschs die tot den tijt der beteringhe inghestelt sijn.

+ C

* 11

Maer Christus een aencomende hooghe priester der toecomender goeden is door een meerder ende volmaecter tabernakel niet met handen ghemaect, dat is niet van desen maecsel

12

noch door tbloet der bocken oft calueren, maer door sijn eyghen bloet, eens ingaen in dat heylich, hebbende gheuonden die eewighe verlossinghe.

* 13

Want eest dat het bloet der bocken ende der stieren, ende dasschen vanden veerscalue bespraeyt sijnde die besmette heylicht tot die suyueringe des vleeschs

14

⁺hoe veel te meer heeft het bloet Christi, die door den heylighen gheest sij seluen Gode onbesmet gheoffert heeft, ons conscientie ghesuyuert van doode wercken om te dienen den leuenden Godt?

+ D

15

Ende daerom is hy een middelaer des nieuwen testaments, op dat die ghene die gheroepen sijn (ouermidts die doot die daer tusschen comen is, tot verlossinghe van die ouertredinghen die onder dierste testament waren) ontfanghen souden die belofte der eewigher erffelijcheyt.

* 16

Want waer een testament is, daer eest van noode dat die doot des testamentmakers daer nae volghe,

17

Want het testament is in die dooden gheuesticht, anders so en eest noch niet van weerden als hy noch leuet diet testament ghemaect heeft.

18

⁺Daerom so en is het ierste voorwaer sonder bloet oock niet gheheylicht gheweest,

+ E

19

want als alle tghebodt der wet van Moyses ghelesen was alle den volcke, soo heeft hy, nemende tbloet der calueren ende bocken met water ende purpur wolle, ende hysope, den seluen boeck oock ende alle tvolck bespraeyt

20

segghende Dit is bloet des testaments, dwelck God tot v lieden gheboden heeft.

21

Oock heeft hy het tabernakel ende alle die vaten des diensts, desghelijcks metten bloede bespraeyet,

22

Ende by nae alle dinghen worden doort bloet nae die wet ghesuyuert, ende sonder bloetstortinghe en wort gheen verghiffenisse ghedaen.

23

⁺Aldus dan eest voorwaer van noode die voorbeelden der hemelscher dinghen hier mede ghesuyuert te worden, maer die

+ F

[p. *900]

selue hemelsche dinghen moeten door beter slachofferanden ghesuyuert worden dan met dese,

24

Want Iesus is niet gheghaen in die heylighe plaetsen met hande ghemaect die voorbeelden der dinghen die warachtich sijn, maer inden hemel op dat hy nv soude teghenwoordich sijn voor Gods aensicht voor ons lieden.

25

Noch oock niet om dat hy sij seluen dicmael soude offeren, ⁺ghelijc die ouerste priester gaet in die heylighe plaetse alle iaere, met vreemden bloede,

+ G

26

want anders soo waert van noode dat hy dicmael lijden soude van tbeghinsel der werelt, Maer nv heeft hy hem eens gheopenbaert, in die veruullinghe der tijden tot een afnemen van die sonde door sijn slachofferande,

27

Ende ghelijck den mensche ghestelt is eens te steruen, ende daer nae het ordeel,

28

alsoo is Christus oock eens gheoffert gheweest om die sonden van veel menschen gheheel af te nemen, ten tweeden sal hy openbaren sonder sonde den ghenen die hem verwachten ter salicheyt.