Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺DIe somme van tghene datter gheseyt wordt is dit. Wij hebben sulcken hooghe priester die gheseten is in die rechte sijde vanden stoel der grootheyt in die hemelen,

+ A

2

een dienaer der heyligen, ende des warachtichs tabernakels dwelck die Heere vast ghemaect heeft, ende niet die mensch,

3

Want alle hooch priester wort ghestelt om ghiften ende slachoffereanden te offeren, daerom eest van noode dat dese wat hebbe dat hy offeren mach,

4

Daerom waer hi op deerde, soo en waer hy gheen priester die wijle datter waren die nae die wet gauen offerden,

5

⁺die welcke der ghelijckenissen, ende der scaduwen dienen van die hemelsche dinghen, Ghelijck Moysi gheantwoort is, als hi het tabernakel volmaecte. Siet (seyde hy) dat ghijt al doet nae dat voorbeelt dwelck v ghetoont is opden berch,

+ B

6

Maer nv heeft hy eenen beteren dienst vercreghen soo vele als hy eens beters testaments middelaer is, dwelc in beter beloften vast ghemaeckt is,

7

Want hadde dat ierste onberispelijc gheweest, so en souder gheen plaetse voor een ander ghesocht worden,

8

Want henlieden misprijsende seyt hy. ⁺Siet daer sullen daghen comen, sprecct die Heere, ende ick sal vomaken ouer thuys van Israel, ende ouer thuys van Iuda een nieu testament,

+ C

9

niet nae dat testament dwelck ick haren vaderen ghemaect hebbe, opden dach als ick hen hant ghenomen hebbe dat icse wtleyden soude wten lande van Egipten, want sij en sijn niet ghebleuen in mijn testament, ende ick hebse ongheacht ghelaten seyt die Heere.

10

Want dit is het testament dat ick maken sal den huyse van Israhel nae dese daghen seyt die Heere, gheuende mijn wetten in hen verstant, ⁺ende in hen herte sal icse scrijuen ende ick sal hen tot eenen God sijn, ende sij sullen my tot een volck sijn,

+ D

11

ende een ieghelijck en sal sijnen naesten niet leeren, ende een ieghelijc sijnen broedere, segghende. Kent den Heere, want sij sullen my allegader kennen vanden minsten totten meesten van henlieden,

12

want ick sal ghenadich sijn haren ongherechticheden ende haerder sonden en sal ic nv voorts niet meer ghedencken,

13

Ende segghende een nieuwe, heeft hy het ierste veroudert, Maer wat veroudert ende veriaert wort, dat is by sijn eynde.