Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺VVant dit is Melchisedec die coninck van Salem een priester des oppersten Godts, die welcke Abraham teghen ghinck doen hy wederom comen was vanden slach der coninghen, ende heeft hem ghebenedijt,

+ A

2

den welcken Abraham oock wtghesceyden heeft die thienden van alle dinghen, dese wort ten iersten bediet een coninc der rechtuerdicheyt, ende daer nae een coninc van Salem dat is een coninck des vreedts,

3

sonder vader, sonder moeder, sonder afcoemste van gheslachte, noch beghin der daghen noch eynde des leuens hebbende, Ende hy ghelijc sijnde den sone Godts, blijft Priester inder eewicheyt.

4

Maer aensiet hoe groot dat dese is den welcken Abraham die patriarck thienden ghegheuen heeft vanden besten dinghen,

5

Ende voorwaer die van Leuijs kinderen het priesterscap ontfanghende, hebben een ghebodt die thienden te ontfanghen vanden volcke nae die wet dat is van haren broederen, ⁺hoe wel dat sij oock ghecomen sijn wt Abrahams lendenen,

+ B

6

Ende hy wiens gheslachte niet mede ghetelt en wort onder henlieden die heeft thienden ontfanghen van Abraham, ende hi heeft desen die de beloften hadde ghebenedijt,

7

Ende sonder eenich wedersegghen wordt het ghene dat minder is ghebenedijt van dat beter is,

8

Ende hier ontfanghen die sterffelijcke menschen die thienden, maer daer betuycht hy dat hy leeft,

9

Ende (om alsoo te spreken) door Abraham is Leui die de thienden ontfanghen heeft, ooc verthient gheweest,

10

want hy was noch in des vaders lendenen doen Melchisedec hem te ghemoete quam.

11

Daerom eest dat die veruullinghe doort Leuitelijc priesterscap was (want het volck heeft onder hem die wet ontfanghen) wat waert dan noch van noode datter na Melchisedecs ordinancie een ander priester opstaen soude ende dat die niet en soude nae die ordinancie van Aaron ghenoemt worden?

12

⁺Want als het priesterscap verstelt wort, so eest ooc van noode datter ooc een verstellinghe der wet ghesciede,

+ C

13

want die ghene daer dese dinghen af ghesproken worden, die is van een ander gheslachte waer af niemant aenden outaer ghedient en heeft.

14

Want het is openbaer dat ons Heere is van Iudas geslachte in welc geslachte Moyses vanden priesters niet geproken heeft,

15

Ende dit blijct noch meer eest datter nae die ghelijckenisse van Melchisedec een ander priester opstaet

16

die niet ghemaect en is nae die wet des vleeschelijcs ghebodts, maer nae die cracht des oneyndelijcken leuens,

17

Want hy betuycht. Ghy sijt een priester inder eewicheyt, na die ordinancie van Melchesedec

18

want voorwaer daer wort een verworpinghe des voorgaende ghebodts ghedaen, om sijn crancheyt ende onnutticheyt,

19

Want die wet en heeft niet ter volcomenheyt ghebracht, maer sij was een inleyden van een be-

[p. *899]

ter hope, door die welcke wij Gode ghenaken,

20

Ende in soo vele als dit niet en is sonder eedt (want die andere sijn voorwaer sonder eedt priesters gheworden,

21

maer dese met eenen eedt door den ghenen die tot hem gheseyt heeft. ⁺Die Heere heuet ghesworen ende ten sal hem niet berouwen, ghy sijt een priester inder eewicheyt)

+ D

22

in alsoo vele is Iesus eens beters testaments belouer geweest,

23

Ende die andere sijn voorwaer veel priesters gheweest, om dat sij door die doot beledt worden altijt te blijuen,

24

maer dese om dat hy inder eewicheyt blijft, heeft een eewich priesterscap.

25

Waerom dat hy oock inder eewicheyt mach salich maken, gaende door sij seluen tot Gode altijt leuende om te bidden voor ons

26

Want het betaemde dat wij alsulcken hooghen priester souden hebben, heylich, onnosel, onbesmet, versceyden van die sondaers, ende hoogher dan die hemelen gheworden,

27

die gheenen noot en heeft alle daghe (ghelijck die priesters) ierstmael voor sijn misdaden slachofferanden te offeren, ende daer nae voor des volcs misdaden, want dat heeft hy eens ghedaen, sij seluen offerende,

28

want die wet steldt tot priesters menschen die crancheyt hebben, maer dwoort des eedts, dwelc nae die wet, is den sone inder eewicheyt volmaect.