Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DAerom achterlatende dwoort van Christus beghinsele, laet ons ter volcomenheyt varen niet wederom legghende het fundament der penitencien, van doode wercken, ende des gheloofs tot Gode,

+ A

2

van die leeringhen der doopselen, ende ooc van doplegghen der handen, ende van die verrijsenisse der dooden, ende van dat eewich ordeel.

3

Dit sullen wij ooc doen, eest dat Godt ghehenghet,

4

Want het is onmoghelijck dat die ghene die eens verlicht hebben gheweest, ende hebben ooc ghesmaect die hemelsche gaue, ende sijn deelachtich gheworden des heylichs gheests

5

ende hebben ooc niet te min ghesmaect dat goet woort Gods, ende die crachten der toecomender werelt,

6

ende afgheuallen sijn souden wederom vernieuwt worden ter penitentien, wederom hen seluen cruycende den sone Gods, ende hem bespottende,

7

⁺Want een eerde die dickmael den reghen op haer comende drinct, ende is voorts brenghende bequaem cruyt, hem vanden welcken sij ghebouwet wort, ontfanct die benedictie van Godt,

+ B

8

maer die voortsbrengt dornen ende distelen, die is verworpen, ende seer nae by der maledictien, wiens eynde sal wesen ter verberringhen,

9

Maer wij betrouwen van v lieden mijn alderliefste beter dinghen, ende naerder der salicheyt, hoe wel dat wij alsoo spreken.

10

Want Godt en is niet onrechtuerdich dat hy ws wercs soude vergheten, ende uwer liefden die ghy ghetoont hebt in sijnen naem, die den heylighen ghedient hebt, ende noch dient,

11

⁺Maer wij begheeren dat een ieghelijc van v lieden vertoont die selue sorchuuldicheyt, tot dat volbrenghen der hopen totten eynde toe,

+ C

12

op dat ghy niet traech en wort, maer naeuolgers der gheender die door tghelooue ende verduldicheyt die beloften sullen beeruen,

13

Want God Abrahe ghelouende (om dat hy niemanden meerder en hadde by den welcken hy sweren soude) heeft ghesworen by sij seluen

14

segghende. Ick sal v ghebenedijdende ghebenedijden ende vermenichfuldighende vermenichfuldighen,

15

Ende alsoo lancmoedelijc verdraghende heeft hy die belofte vercreghen,

16

want die menschen sweren by eenen meerderen dan sij sijn, ende het eynde van allen hen ghekijf ter versekeringhen is den eedt.

17

⁺Waer in Godt willende den erfghenamen die beloften oueruloedelijcker toonen die onueranderlijcheyt sijns raets heeft daer eenen eedt tusschen-ghestelt,

+ D

18

op dat wij door twee onueranderlijcke dinghen, midts die welcke Gode onmoghelijck is te lieghen, een alderstercste solaes souden hebben, die daer toe vlieden om te houden die voorghestelde hope,

19

die wi hebben als eenen ancker der zielen seker ende vaste, ende ingaende tot dat binnenste des voorhancsels

20

daer die voorlooper Iesus voor ons inghegaen is, gheworden sijnde hooch priester nae die ordinacie van Melchisedec inder eewicheyt.