Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺DIe liefde der broederlijcheyt blijue in v lieden,

+ A

2

ende die herbergsaemheyt en wilt niet vergheten, want hier door hebben die sommighe behaecht, die Enghelen ter herberghen ontfanghen hebbende.

3

Weest ghedachtich der gheuanghenen, als mede gheuanghen, ende der gheender die arbeyden, als die selue oock mede int lichaem woont,

4

Den houwelijck is eerlijck, by ieghelijcken ende dat bedde is onbesmet, want die hoereerders ende ouerspeelders sal Godt ordeelen,

5

Laet die manieren sijn sonder ghiericheyt, te vreden wesende met die teghenwoordighe dinghen, Want hy heeft gheseydt, Ick en sal v niet afgaen noch verlaten,

6

alsoo dat wij ghetrouwelijck segghen moghen. Die Heere is mijn helper, ick en sal niet vreesen wat my die mensch doet

7

Weest ghedachtich uwer ouersten, die v lieden ghepreect hebben dwoort Godts, der welcker leuens wtganck ghy aenmerckende volghet tghelooue,

8

⁺Iesus Christus is ghisteren ende heden, die selue is oock inder eeewicheyt.

+ B

* 9

Met versceyden ende vreemde leeringhen en laet v niet verleyden, Want tis dalder beste door die gratie therte te vestighen, niet met die spijsen die niet ghebaet en hebben den ghenen die daer in ghewandelt hebben.

10

Wij hebben eenen outaer waer af si gheen macht en hebben te eten, die den tabernakel dienen,

11

Want welcker dieren bloet voor die sonde ghedraghen wordt in dalder heylichste plaetse, door den ouersten priester, deser lichamen worden verbant buyten die legheren,

12

Daerom heeft Iesus oock, om dat hy door sijn bloet het volck heylighen soude, buyten die poorte gheleden.

13

Daerom laet ons tot hem wtgaen buyten die legheren, sijn verwijt draghende,

14

want wij en hebben hier gheen blijuende stadt, maer wij soecken een toecomende.

15

⁺Hierom laet ons door hem die offerande des loefs altijt Gode offeren, dat is die vrucht der lippen die sijnen naem belijdende sijn

+ C

16

Maer der weldadicheyt, ende der mededeelinghen en wilt niet vergheten, want door sulcke offeranden wort Godt vernoecht.

17

+ Weest onderdanich uwen ouersten, ende sijt hen onderworpen, want sij waken ghestadelijck als die redene voor v sielen sullen gheuen, op dat sij dat met blijscap doen moghen ende niet suchtende, want dat en is v lieden niet profijtelijck.

18

Bidt voor ons want wij betrouwen dat wij een goede consciencie hebben, willende in alles wel leuen,

19

Maer te meer begheer ic dat ghy dit doen wilt, om dat ick te haestelijcker mach v lieden wederom ghegheuen worden,

20

maer Godt des vreedts die wt die dooden ghebracht heeft den grooten herder der schapen, int bloet des eewichs testaments, onsen Heere Iesun Christum,

21

⁺die maecke v bequaem in alle goet, op dat ghy sijnen wille doet, moecht doende in v lieden dat behaghe voor hem door Iesum Christum, den welcken is glorie tot die eewicheyt der eewicheden. Amen

+ D

* 22

Ende ick bidde v broeders dat ghy verdraghet dwoort des vertroostens, want ick hebt v met seer corte woorden ghescreuen.

23

Weet dat onse broeder Timotheus vrij ghelaten is, metten welcken (eest dat hy haestelijcken coemt) sal ick v lieden sien.

24

Groet alle uwe ouerste, ende alle die heylighen, Die broeders van Italien groeten v lieden,

25

Die gratie sij met v allen. Amen.

Hier voleynt die Epistel van sinte Pauwels totten Hebreen.