Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺DAerom laet ons vreesen, datter by auontueren iemant van v lieden verlaten hebbende die belofte van te ghaen in sijn ruste, niet gheacht en worde daer te ghebreken,

+ A

2

Want het is ons ooc vercondicht, ghelijc dat henlieden was, maer dwoort datse ghehoort hebben en heeft hen niet ghebaet, om dat niet ghemengt en was metten ghelooue van die ghene diet ghehoort hebben,

3

want wi die ghelooft hebben sullen in die ruste gaen, ghelijc hy gheseyt heeft. Ghelijck ick ghesworen hebbe in mijnen toren, eest dat sij in mijn ruste ghaen sullen, Ende dat was voorwaer als die wercken van dat ierste maecsel der werelt volmaect waren,

4

want hy heeft op een plaetse vanden seuensten dach gheseyt aldus. ⁺Ende Godt heeft gherust opden seuensten dach, van alle sijnen wercken,

+ B

5

Ende in dese plaetse wederom. Eest dat si gaen sullen in mijn ruste

6

Aenghesien dan dattet staet te comen datter sommige in sijn ruste sullen gaen, ende dat si, den welcken dat ten iersten vercondicht is gheweest, daer niet inghegaen en sijn om die ongheloouicheyt wille,

7

soo ordineert hy wederom eenen dach huyden, door Dauid segghende, nae soo veel tijts, ghelijc dat voorseyt is. Eest dat ghy heden sijn stemme hoort, soo en wilt v herten niet verherden,

8

Want hadde hen Iesus ruste ghegheuen, soo en soude hy nemmermeer daer naer van eenen anderen dach ghesproken hebben.

9

⁺Hierom soo worter noch eenen rust dach achter ghelaten voor Gods volc

+ C

10

Want die in sijn ruste ghecomen is, die rust ooc van sijnen wercken, ghelijck Godt oock van die sijne.

11

+ Daerom laet ons haesten om te comen in die ruste, op datter niemant en valle in dat selue exempel der ongheloouicheyt,

12

want het woort Gods is leuende ende crachtich, ende scherper door snijdende dan eenich sweert op beyde sijden snijdende, ende het gaet doere tot dat sceyden der zielen ende des gheests, ende der tsamen voechselen ende des merchs, ende tis een onderscheyder van die ghedachten ende meyninghen des herten, Ende daer en is gheen creatuer onsienlijc voor sijn aenschijn,

13

⁺maer alle dinghen sijn bloot, ende oopen voor sijn ooghen, vanden welcken wij sprake hebben.

+ D

14

Nv wij dan hebben eenen hooghen priester die ghegaen is door die hemelen Iesum den sone Gods, soo laet ons houden die belijdinghe,

15

want wij en hebben gheenen hooghen priester die niet en soude connen medelijden hebben met onse crancheden, maer in alles gheproeft nae die ghelijckenisse sonder sonde,

16

Daerom laet ons toe gaen met betrouwen tot den throon der gratien, op dat wij bermherticheyt moghen vercrijghen, ende dat wij gratie moghen vinden als wi die helpe van doen sullen hebben.