Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

+ 1

⁺DAerom ghy heylighe broeders deelachtich vanden hemelschen roep, aenmerct den Apostel ende bisscop van onser belijdinghen Iesum

+ A

* 2

die ghetrouwe is den ghenen die hem ghemaect heeft, ghelijck ooc Moyses was in alle sijn huys.

3

Want dese is soo veel meerder glorien weerdich ghehouden gheweest bouen Moyses, ghelijck hy meerdere eere heeft dan thuys die ghene diet ghetimmert heeft,

4

want elc huys wort van iemanden ghetimmert, maer diet al ghescapen heeft dat is Godt,

5

Ende Moyses was voorwaer ghetrouwe in alle sijn huys, als een dienaer tot een ghetuyghenisse der dinghen die te segghen waren,

6

⁺Maer Christus is als die sone in sijn huys, welck huys wi sijn, eest sake dat wij het betrouwen ende die glorie der hopen totten eynde toe vast behouden.

+ B

* 7

Daerom ghelijc die heylighe gheest seyt. Eest dat ghy heden sijn stemme hoort,

8

soo en wilt v herten niet verherden, ghelijc in die verbitteringhe nae den dach der becoringhen in die woestijne,

9

Daer v vaders my ghetempteert hebben, sij hebben gheproeft ende ghesien mijn wercken

10

veertich iaren, Warom dat ick verbolghen ben gheweest op dit gheslachte, ende heb gheseyt. ⁺Sij dolen altijt metter herten, Maer sij en hebben mijn weghen niet bekent,

+ C

11

den welcken ick ghesworen hebbe in mijn gramscappe dat sij niet en sullen in mijn ruste comen.

+ 12

Siet toe broeders dat by auontueren in iemant van v lieden niet en sij een quaet herte der ongheloouicheyt om te sceyden vanden leuende Godt

13

maer vermaent malcanderen daghelijcs, soo langhe alsmen heden noemt, op datter niemant van v lieden verhart en worde door die bedriechelijcheyt der sonden,

14

want wij sijn Christus deelachtich gheworden, ⁺eest by alsoo nochtans dat wij het beghinsel van sijnder substancien totten eynde vast behouden.

+ D

* 15

Als daer gheseyt wort. Eest dat ghy heden sijn stemme hoort, soo en wilt v herten niet verharden ghelijct was in die verbitteringhe,

16

want die sommighe hem hoorende hebben hen verbittert. maer niet alle die ghene die ghereyst sijn wt Egipten door Moysen,

17

Maer teghen die welcke heeft hy verbolghen gheweest die veertich iaren lanck? En was dat niet teghen die ghene die ghesondicht hebben der welcker doode lichamen nedergheworpen sijn in die woestijne?

18

Maer den welcken heeft hy ghesworen dat sij niet gaen en souden in sijn ruste dan den ghenen die ongheloouich gheweest hebben?

19

Ende wij sien dat sij daer niet in gaen en mochten, om die ongheloouicheyt.