Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺DAerom moeten wij te meer onderhouden tghene dat wij ghehoort hebben, dat wij by auontueren niet teenenmale en veruloeyen,

+ A

2

want eest sake dat het woort dat door die Enghelen gheseyt is vast ghemaect is gheweest, ende eest dat alle ouertredinghe ende onghehoorsaemheyt rechtuerdighe vergeldinghe des loons ontfanghen heeft,

3

hoe sullent wij dan ontulieden, eest dat wi soo groote salicheyt versuemen die welcke doen sij een beghinsel ghenomen hadde vertelt te worden door den Heere, vanden ghenen diet ghehoort hebben,

4

soo is die in ons gheuesticht, ouermidts Gods mede ghetuyghenisse door teekenen, ende wonderlijcke wercken, ende versceyden myrakelen, ende versceyden deylinghen des heylichs gheests, na sijnen wille,

5

Want Godt en heeft den Enghelen die toecomende werelt niet ondergheworpen daer wij af spreken,

6

⁺Maer een heefter ghetuyghenis ghegheuen op een plaetse segghende. Wat is een mensch dat ghy sijns ghedachtich sijt, oft een sone des menschen dat ghi hem besoect?

+ B

+ 7

Ghi hebt hem ghemaect een luttel minder dan die Enghelen, met glorie ende eere hebdi hem ghecroont,

8

ende ghi hebt hem ghestelt ouer die wercken uwer handen. Alle dinghen hebdi gheworpen onder sijn voeten, want in dien dat hy alle dinghen hem onderworpen ghemaect heeft, soo en heeft hy niet achterghelaten dat hem niet ondergheworpen en is, maer nv en sien wij noch niet alle dinghen hem onderworpen

9

Maer dien Iesum die een luttel beneden die Enghelen vercleynt was, sien wij om dat lijden des doodts, ⁺met glorie ende eere ghecroont, op dat hy door die gratie Gods voor alle menschen die doot soude smaken,

+ C

10

want het betaemde hem om den welcken alle dinghen sijn, ende door den welcken alle dinghen sijn, die veel

[p. *897]

kinderen ter glorien ghebracht hadde, dat hy den werckere haerder salicheyt doort lijden soude volmaken,

11

want die heylich maect ende die heylich ghemaect worden, sijn wt eenen. Om welcke sake hy hem niet en scaemt henlieden broeders te noemen segghende,

12

Ic sal uwen naem vercondighen mijnen broeders, int midden der kercken sal ick v louen,

13

Ende wederom. Ick sal wesen op hem betrouwende, Ende wederom. Siet hier ick ende mijn kinderen die my Godt ghegheuen heeft,

14

⁺Daerom want die kinderen ghemeynscap hebben ghehadt metten vleesch ende bloede, soo is hy oock desghelijcs haers deelachtich gheworden, op dat hi door die doot hem verderuen soude, die des doots ghewelt hadde, dat is den duyuel,

+ D

15

ende dat hy hen verlossen soude die ouermidts vreese der doot in allen hen leuen verbonden waren der slauernien.

16

Want hy en heeft nerghens die Enghelen aenghenomen, maer hy heeft Abrahams saet aenghenomen,

17

waerom dat hy in alles heeft moeten ghelijc wesen sijnen broeders, op dat hy bermhertich soude worden, ende een ghetrouwe bisscop voor Godt, op dat hy versoenen soude die misdaden des volcks,

18

Want door tghene daer hy mede ghepijnt is gheweest ende ghetempteert, is hy oock machtich den ghenen die ghetempteert worden te helpen.