Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

+ 1

⁺MAer spreect ghy tghene dat der saligher leeringhen betaemt,

+ A

2

Den ouders dat sij sober sijn, eerbaer, voorsienich, gantsch int ghelooue, in die liefde, ende in die verduldicheyt,

3

Desghelijcs oock die oude vrouwen dat sij sijn in een heylich habijt gheen schande sprekerssen, niet hen gheuende tot veel wijns te drincken wel leerende,

4

op dat sij wijsheyt leeren moghen den ionghen dochteren, dat sij haer mans lief hebben, haer kinderen beminnen

5

ende wesen voorsienich, eerbaer, sober, hebbende sorghe haers huys, goedertieren, haren mans onderdanich, op dat het woort Gods niet gelastert en worde,

6

⁺Die iongelinghen suldi desghelijcs vermanen dat sij sober sijn.

+ B

7

In alle dinghen vertoont v seluen tot een exempel van goede wercken, in leeringhe, in oprechticheyt, in rijpicheyt van manieren,

8

ende v woort sij gantsch ende onstraffelijck op dat die ghene die ons teghen is, hem ontsien mach, niet quaets hebbende dat hy van ons soude moghen segghen

9

Die knechten vermaent datse haren heeren onderdanich sijn, in alles behaghende niet teghen segghende,

10

niet bedrieghende, ⁺maer in alles goede ghetrouwicheyt toonende, op dat sij die leeringhe Godts ons salichmakers moghen in alles vercieren.

+ C

* 11

+ Want die gratie Gods ons salichmakers heeft haer gheopenbaert alle menschen

12

ons onderwijsende, dat wij versakende die ongoddelijcheyt, ende die weerlijcke begheerten, soberlijck, ende rechtuerdelijck, ende Godvruchtichlijck leuen souden in deser werelt

13

verwachtende die salighe hope ende die toecoemst van die glorie des grooten Godts ende ons salichmakers Iesu Christi,

14

⁺die sij seluen heeft ghegheuen voor ons lieden, om dat hy ons verlossen soude van alle ongherechticheyt, ende ons voor hem soude suyueren een aenghenaem volck, ghestadelijck volghende goede wercken.

+ D

* 15

Dit spreect, ende vermaent, ende straft met alder macht, Niemant en versmade v.