Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺VErmaentse den princen ende der ouerheyt onderdanich te sijne, ende den gheboden ghehoorsaem, tot alle goede wercken bereedt te sijne,

+ A

2

niemanden te lasteren, niet kijfachtich te sijn, maer manierlijck toonende alle saechtmoedicheyt tot alle menschen,

3

want wij waren voortijts oock onwijs ongheloouich, dolende, dienende versceyden lusten, ende wellusticheden, in quaetheyt, ende nijdicheyt leuende ghehaet, malcanderen hatende.

4

+ ⁺Maer doen die goedertierenheyt ende liefde Godts ons salichmakers tot die menschen gheopenbaert is gheweest,

+ B

5

niet wt die wercken der rechtuerdicheyt die wij ghedaen hebben, maer nae sijn bermherticheyt heeft hy ons salich ghemaect, door het wasschen der wedergheboorten ende vernieuwinghen des heylichs gheests,

6

den welcken hi in ons ghestort heeft oueruloedelijck, door Iesum Christum onsen salichmaker,

7

op dat wij gherechtuerdicht sijnde door sijn gratie erfghenamen souden sijn, nae die hope des eewichs leuens.

* 8

Het is een gheloouelijck woort, ⁺ende hier mede wil ick dat ghijse vestighen sult, op dat sij die Gode gheloouen neerstich moghen sijn om met goede wercken voor te ghaen, Dese dinghen sijn den menschen goet ende nut.

+ C

9

Maer sotte vraghen, ende afcoemsten der gheslachten, ende kijuagien, ende disputatien der wet schouwet, want sij sijn onnut ende ydel,

10

Eenen kettersschen mensch suldi nae een oft twee straffinghen schouwen,

11

wetende dat hi verkeert is die sulc is, ende hy misdoet, midts dat hi door sijn eyghen vonnisse verdoemt is.

12

⁺Als ick tot v sal senden Arteman oft Tycichum soo haest v om tot my te comen tot Nicopolim, want ick heb voor my ghenomen al daer te ouerwinteren,

+ D

13

Zenam den wetgheleerde ende Apollo sendt sorchuuldelijck vore, op dat hen niet en ghebreke,

14

Ende laet die onse leeren voor te ghaen in goede wercken tot nootelijcken ghebruycke, op dat sij niet onvruchtbaer en sijn,

15

Alle die met my sijn die groeten v. Groetse die ons lief hebben int ghelooue, Die gratie Godts sij met v allen. Amen.

Hier voleynt die Epistel van sinte Pauwels tot Titum.