Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PAULUS een dienaer Gods, ende een Apostel Iesu Christi nae tghelooue van die wtuercorene Gods, ende nae die kennisse der waerheyt, welc nae die Goduruchticheyt is

+ A

2

tot die hope van deewich leuen, dwelc God gheloeft heeft die niet en liecht, voor die eewighe tijden,

3

maer heeft gheopenbaert te sijnen tijde sijn woort door die predicatie die my beuolen is nae tghebodt Gods ons salichmakers,

4

Tito den beminden sone, nae tghemeyn ghelooue sij gratie ende vrede van Godt den vader ende van Christo Iesu onsen salichmaker,

5

⁺Ter saken van desen heb ick v te Creten ghelaten, om dat ghy soudt beteren tghene datter ghebreect, ende dat ghy van steden te steden soudt priesters stellen, ghelijck ick v gheordineert hadde,

+ B

6

Isser iemant omberispelijc, maer eender huysvrouwen man

[p. *895]

hebbende gheloouighe kinderen, niet wesende beticht van ouerdadicheyt, oft onghehoorsaem,

7

want een bisscop moet omberispelijck sijn, als een Gods wtdeylder niet houerdich, niet toornich, niet een wijnsuyper geen vechter, ⁺niet ghierich nae scandelijck ghewin,

+ C

8

maer gheerne herberghende, goedertieren, sober, rechtuerdich, heylich, suyuer van leuen,

9

vast houdende het gheloouich woort, dat nae die leeringhe is, op dat hy machtich sij te vermanen door rechte leeringhe, ende te verwinnen die daer teghen segghen,

10

Want veel isser ongehoorsaem, ydel clappers, ende verleyders, aldermeest die van die besnijdenisse sijn,

11

die welcke moeten ghestraft worden, die alle huysen verkeeren, leerende dat niet en behoort, ter saken van tscandelijc ghewin.

12

Een wt henlieden hen eyghen propheet heeft gheseyt. Die Cretensen sijn altijt loghenachtich, quade beesten traghe buycken,

13

⁺Dat ghetuyghenis is warachtich, Daerom soo straftse strenghelijck, dat sij moghen oprecht sijn int ghelooue,

+ D

14

niet lettende op die Ioetsche fabelen, ende op die gheboden der menschen, die hen afkeeren van die waerheyt.

15

Alle dinghen sijn suyuer den suyueren, maer den besmetten ende den ongheloouighen en is gheen dinc suyuer, want hen ghedachte, ende hen conscientie sijn al besmet,

16

Sij belijden dat sij God kennen, maer metten wercken loochenen sijt, aenghesien dat sij afgrijselijck sijn ende ongheloouich, ende tot alle goeden wercken verworpen.