Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MAer weet dit, dat in die laetste daghen aencomen sullen sorghelijcke tijden,

+ A

2

ende daer sullen menschen sijn hen seluen lief hebbende, ghierighe, hoochmoedighe, hoouerdighe, lasteraers, den ouders onghehoorsaem, ondancbarighe, boose wercken doende,

3

sonder beweghelijcheyt, onvredelijc, besculdighers, oncuyssche, wreet, sonder goedertierenheyt,

4

verraders, crijghelaers, opgheblasen, ende liefhebbers der wellusten meer dan Gods,

5

⁺hebbende voorwaer eenen scijn des gheestelijcs leuens, maer die duecht van die verloochenende, Dese scouwet ooc,

+ B

6

Want van dese sijn sij die die huysen tot binnen doorgaen, ende leyden gheuanghen die vroukens die met sonden beladen sijn die gheleyt worden van verscheyden begheerten,

7

altijt leerende, ende nemmermeer tot die kennisse der waerheyt comende,

8

Maer ghelijck Iannes ende Mambres Moysi wederstonden, alsoo wederstaen dese der waerheyt, menschen die verarghert sijn van verstande, verworpen van tghelooue,

9

maer sij en sullen voorts niet meer toenemen, want hen dwaesheyt sal allen menschen openbaer wesen, ⁺ghelijc der voorseyder ooc gheweest is,

+ C

10

Maer ghy hebt vercreghen mijn leeringe, insettinge, voornemen, ghelooue, lancmoedicheyt, liefde, verduldicheyt,

11

veruolghinghe, tribulatien, ghelijc my ghedaen sijn te Antiochien, te Iconien, te Listren welcke veruolghinghen ick gheleden hebbe, ende van alle dese heeft my die Heere verlost,

12

ende alle die Godlijc leuen willen in Christo Iesu, die sullen veruolghinghe lijden,

13

Maer die quade menschen ende verleyders sullen vorderen tot argher, dolende ende in dolinghe brenghende,

14

⁺maer blijft ghy in die dinghen die ghi gheleert hebt, ende v beuolen sijn, wetende van wien ghy die gheleert hebt,

+ D

15

ende dat ghy van v kintscheyt die heylighe scriften gheweten hebt, die v moghen onderwijsen, ter salicheyt, doort ghelooue datter is in Christo Iesu,

16

Alle scriftuere van Godt inghegheuen is profijtelijck om te leeren, om te berispen, om te straffen, om te onderwijsen in die rechtuerdicheyt,

17

op dat een mensche Godts mach volmaeckt sijn tot alle goede wercken onderwesen.