Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺DAer om ghy mijn sone, wert versterct in die gratie die daer is in Christo Iesu,

+ A

2

ende in die dinghen die ghy van my ghehoort hebt doer veel ghetuyghen. Dese dinghen beueelt den gheloouighen menschen die bequaem sijn sullen ooc andere te leeren.

3

Arbeyt als een goet ridder Christi Iesu.

4

Niemant die Gode dient en becommert hem met weerlijcke saken, op dat hy dien mach behaghen, den welcken hi sij seluen ouerghegheuen heeft.

5

Want ooc wie in eenen camp strijdt die en wort niet ghecroont, ten sij dat hy wettelijck ghestreden hebbe.

6

Nae den arbeyt moet die ackerman ierst van die vruchten ghenieten.

7

Verstaet tghene dat ick segghe. Want die Heere sal v in alles verstant gheuen.

8

⁺Weest ghedachtich dat die Heere Iesus Christus verresen is vanden dooden, wt Davids saet nae mijn euangelie,

+ B

9

daer ic in arbeyde totten banden toe, als qualijck doende, maer dwoert Gods en is niet ghebonden.

10

Daer om verdraghe ick alle dinghen om die wtuercorene, dat sij oock souden vercrijghen die salicheyt, die daer is in Christo Iesu, met die hemelsche glorie.

11

Tes een gheloouelijck woert. Want eest dat wy mede ghestoruen sijn, soo sullen wy oock mede leuen

12

eest dat wy mede verdraghen soe sullen wy oock mede regneren, eest dat wijt loochenen, soe sal hy ons oock loochenen,

13

eest dat wy niet en gheloouen, hy blijft getrouwe, hy en mach sij seluen niet loochenen.

14

Dit vermaent betuyghende voer den Heere. ⁺En wilt niet strijden, met woerden (want ten dient nerghers toe) dan tot verkeeringhe der gheender diet hooren.

+ C

15

Sijt neerstelijck sorchuuldich v seluen prijselijck te bewijsen voer Godt eenen ombescamelijcken wercman, oprechtelijck handelende dwoert der waerheyt.

16

Maer die ongheestelijcke ende onnutte clappernien scouwet, want sij vorderen seer tot die ongoddelijcheit,

17

ende hen sprake cruypt voerts als die cancker siecte. Onder die welcke is Hymeneus ende Philetus

18

die vander waerheyt afgheuallen sijn, segghende dat die verrijsenisse nu ghesciet is, ende sij hebben verkeert het ghelooue van den sommighen.

19

Maer het vast fundament Godts staet hebbende desen seghel. Die Heere heeft ghekent wie hem toe behooren, ende hy sceyde vander boosheyt alle die den naem des Heeren noemt.

20

⁺Maer in een groot huys en sijn niet alleen gulden ende silueren vaten, maer oock houten ende eerden, ende die sommighe sijn dienende ter eeren, maer die sommighe ter versmaetheden.

+ D

21

Daer om eest dat hem iemant suyuert van desen, die salsijn een vat ter eeren gheheylicht ende nut den Heere, tot alle goede wercken bereydt.

22

Maer vliet die lusten der ioncheyt, maer volcht die rechtuerdicheyt, ghelooue, liefde, ende vrede metten ghenen die den Heere aenroepen met puerder herten.

23

Maer scouwet die dwase ende ongheleerde vraghen

[p. *894]

wetende dat die kijuagien voortbrenghen,

24

Maer een knecht des heeren en moet niet kijuen, maer saechtmoedich sijn tot allen menschen, bereyt om te leeren, verduldich,

25

met manierlijcheyt straffende die ghene die der waerheyt wederstaen, oft hen Godt tot eenighe tijde penitencie verleende, om die waerheyt te kennen,

26

ende dat sij mochten wederom keeren van des duyuels stricken, vanden welcken sij worden gheuanghen ghehouden tot sijnen wille.