Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PAULUS een Apostel Iesu Christi doer den wille Godts nae die belofte des leuens welc is in Christo Iesu,

+ A

2

Timotheo mijnen alderliefsten sone sij gratie, bermherticheyt, vrede van Godt den vader, ende Christo Iesu onsen Heere.

+ 3

Ick danck Gode, dien ick diene van den voerouderen aen in een puer conscientie, dat ick sonder ophouden heb ghedenckenisse van v in mijn ghebeden, nacht ende dach

4

verlanghen hebbende v te siene, ghedachtich wesende uwer tranen, op dat ick mocht met blijscap veruult worden,

5

nemende een herdencken van tghelooue dat in v ongheveynst is, dat oock te voren ghewoont heeft in v grootmoeder Loide, ⁺ende in v moeder Eunice, ende ick ben oock seker dattet oock in v woont.

+ B

6

Om welcke sake ick v vermane, dat ghy verwect die gratie Gods, die in v is, doer het oplegghen van mijnen handen.

7

Want Godt en heeft ons niet ghegheuen den gheest der vreesen, maer der cracht, ende der liefden, ende der soberheyt.

* 8

+ Daer om en wilt v niet scamen van dat ghetuyghenis ons Heeren, noch van my sijnen gheuanghenen, maer arbeyt te samen met dat euangelie nae die cracht Gods,

9

die ons verlost heeft ende gheroepen doer sijnen heylighen roep, ⁺niet nae onse wercken, maer nae sijn voernemen ende gratie, die ons ghegheuen is in Christo Iesu voer die eewighe tijden.

+ C

10

Maer is nu gheopenbaert doer die verlichtinghe ons salichmakers Iesu Christi, die de doot voerwaer vernielt heeft, maer heeft int licht bracht het leuen, ende die ombederffelijcheyt doert euangelie,

11

int welck ick ghestelt ben een predicant ende een Apostel, ende een meester der heydenen.

12

Om welcke sake ick dese dinghen oock lijde, maer ick en worde niet bescaemt. Want ick weet wien ick ghelooft hebbe, ende ic ben seker, dat hy machtich is mijnen Pant te bewaren tot op dien dach toe.

13

Hebt een forme der saligher woerden die ghy van my ghehoort hebt int ghelooue, ende in die liefde in Christo Iesu.

* 14

⁺Den goeden pant bewaert, doer den heylighen gheest, die in ons woont.

+ D

15

Ghy weet dat wel dat sij alle van my afghekeert sijn alle die in Asien sijn, van die welcke is Phigelus ende Hermogenes.

16

Die Heere gheue bermherticheyt den huysghesinne van Onesiphorus, want sij hebben my dicmael vermaect, ende van mijnder ketenen en heeft hy hem niet gescaemt,

17

maer doen hy te Roome ghecomen was, soe heeft hy my sorchuuldichlijck ghesocht, ende gheuonden.

18

Die Heere verleene hem bermherticheyt te vinden vanden Heere in dien dach. Ende in hoe veel dinghen dat hy my te Ephesen ghedient heeft, dat weet ghy beter.