Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

+ 1

⁺ICk betuyghe voor Gode ende Iesu Christo die ordeelen sal leuende ende doode, ende door sijn toecoemst, ende sijn rijck,

+ A

2

Preect het woort, weest daer neerstich in, tsij oft gheleghen is oft ongheleghen, berispt, smeect, straft, met alle lijdtsaemheyt ende leeringhe,

3

Want daer sal eenen tijt comen dat si gheen salighe leeringhen en sullen verdraghen, maer sij hebbende ioecsel der ooren sullen nae hen begheerten voor hen seluen meesters vergaderen,

4

ende van die waerheyt sullen sij voorwaer het ghehoor afkeeren, maer sullen tot fabulen ghekeert worden,

5

⁺Maer waect ghi, in alles arbeydet, doet het werck van eenen Euangelist, volbrengt uwen dienst, Weest sober,

+ B

6

want ic worde nv ten offer ghedoot, ende den tijt van mijn verscheyden is nakende,

7

Eenen goeden strijdt heb ick ghestreden, den loop heb ick volbracht, tghelooue heb ic bewaert,

8

Voortaen wort my bewaert die croone der rechtuerdicheyt, die my die Heere wedergheuen sal in dien dach, die rechtuerdighe rechter, ende niet alleen my, maer oock den ghenen die sijn toecoemst beminnen. * Haest v tot my te comen gheringhe,

9

want Demas heeft my verlaten, beminnende dese werelt, ende hy is wech ghereyst nae Thessalonicen,

10

Crescens in Galatien, Titus in Dalmatien,

11

⁺Lucas is met my alleen, Neemt Marcum mede, ende brenght hem met v, want hi is my orbaerlijc ten dienste,

+ C

12

Maer Tycichum heb ick ghesonden nae Ephesen,

13

Den mantel die ick te Troaden ghelaten hebbe by Carpum brengt met v als ghy coemt, ende die boecken, maer aldermeest die pargamenten,

14

Alexander die copersmit heeft my veel quaets ghetoont, die Heere sal hem weder loonen nae sijn wercken,

15

den welcken scouwet ghy ooc, want hy heeft seer wederstaen onsen woorde,

16

⁺In mijn ierste verantwoorden en heeft my niemant by ghestaen maer sij hebben my alle verlaten, ten moet hen niet toegherekent worden,

+ D

17

Maer die Heere heef my by ghestaen, ende heeft my versterct op dat door my die predicatie soude volbracht worden, ende dat alle die heydenen souden hooren, ende ick ben verlost gheweest wt den muyl des leeuws,

18

Die Heere heeft my verlost van alle quade wercken, ende hy sal my salich maken in sijn hemelsch rijck, den welcken sij glorie in die eewicheyt der eewicheden, Amen.

19

Groet Priscam ende Aquilam ende Onesiphorus huysghesin,

20

Erastus is te Corinthen bleuen, Maer Trophimum heb ick sieck ghelaten te Mileten,

21

Haest v voor den winter te comen, V groeten Eubulus, ende Pudens, ende Linus, ende Claudia, ende alle die broeders,

22

Die Heere Iesus Christus sij met uwen gheest, Die gratie sij met v, Amen.

Hier voleynt die tweede Epistel van sinte Pauwels tot Timotheum.