Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .v. Capittel.

1

⁺DEn ouden en straft niet, maer smeect hem als eenen vader, die ionghelinghen als broeders,

+ A

2

die oude vrouwen als moeders, die ionghe vrouwen als susters, in alle suyverheyt.

3

Eert die weduwen die warachtiche weduwen sijn,

4

maer eest dat eenighe weduwe heeft kinderen ofts kintskinderen, die leere ierstmael haer huys regeren, ende den ouders onderlinghen dienst verghelden, want dats ghenaem voer Gode,

5

Maer die een warachtighe weduwe es, ende verlaten, die hope in Godt, ende sij ghestadich in smeeckinghen ende biddinghen nacht ende dach,

6

Want die in wellusten leeft, die is leuende doot.

7

Dit ghebiedt oock dat sy onberispelijck sijn,

8

Maer eest dat iemant voer die sijne, ende alder meest voer sijn huysghenoten gheen sorghe en draecht, ⁺die heuet ghelooue gheloochent, ende hy is argher dan een ongheloouighe.

+ B

9

Een weduwe salmen kiesen niet iongher dan van tsestich iaren, die gheweest hebbe maer eens mans huysvrouwe,

10

in goede wercken ghetuyghenis hebbende, eest dat sij kinderen opghebracht heeft, eest dat sij ter herberghen ontfanghen heeft, ist dat sij der heyleghen voeten ghewasschen heeft, eest dat sij den ghenen die in tribulacien waren ghedient heeft, eest dat sij alle goede wercken naegheuolcht heeft.

11

Maer die ionghe weduwen scouwet, want als sij weeldich gheworden sijn teghen Christum, soo willen sij houwen,

12

hebbende die verdoemenisse, want sij dierste trouwe van onweerden ghemaect hebben.

13

Ende daer toe leeren sij ooc ledich van huyse te huyse omloopen, niet alleen ledich, maer oock clappich ende nieusghierich, ⁺sprekende dinghen die niet nootelijck en sijn.

+ C

14

Daer om wille ick dat die ionghe weduwen houwen sullen, kinderen voerts brenghen, moeders des huysghesins wesen, datse gheen oorsake en gheuen den wederpartijder om quaet te spreken.

15

Want die sommighe sijn nu achterwaerts omghekeert nae satanam.

16

Ist dat eenich gheloouich mensch weduwen heeft, die besorghe die, ende en laet die kercke niet verlast worden, op dat die ghene die warachtighe weduwen sijn ghenoech moghen hebben.

17

+ Die Priesters die wel regeren, die sijn dobbel eere weerdich, aldermeest die ghene die arbeyden int woert ende in die leeringhe.

18

Want die scriftuere seyt, Ghy en sult den dorsschenden osse sijnen muyl niet toe binden, ende een wercman is sijns loons weerdich.

19

Teghen eenen priester en wilt gheen clachte ontfanghen, dan onder twee oft drij ghetuyghen.

20

Die sondighen straft voer hen allen, ⁺op dat die andere oock moghen vreese hebben.

+ D

21

Ic betuyghe voer Gode ende Christo Iesu ende den wtuercorenen enghelen, dat ghy dese dinghen bewaert sonder omberadelijcheyt, niet doende in deen oft dander sijde af wijckende.

* 22

En legt niemanden haestelijck die hant op, noch en maect v niet deelachtich van eens anders sonden. V seluen houdt suyuer.

23

En wilt niet meer water drincken, maer ghebruyct een luttel wijns om uwer maghen wille, ende om v vele siecten.

24

Der sommigher menschen souden sijn openbaer, voergaende ten ordeel, maer den sommighen volghen die nae.

25

Desghelijcs oock sijn die goede wercken openbaer, ende die anders sijn en moghen niet verborghen worden.