Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ALle die onder bedwanck knechten sijn, die sullen hen Heeren alder eeren weerdich houden, op dat den naem ende die leeringhe des Heeren niet ghelastert en worde.

+ A

2

Maer die ghene die gheloouighe heeren hebben, die en sullen die niet versmaden, want het sijn broeders maer sij moeten dien te meer dienen, om dat sij gheloouich sijn ende bemint, die der weldaet deelachtich sijn. Dese dinghen leert ende vermaent.

3

Eest datter iemant anders leert, ende gheen ghehoor en gheeft den salighen woerden ons Heeren Iesu Christi, ende der leeringhen die nae die Gods diensticheyt is,

4

die is houerdich, niet wetende, maer quelende in die vraghen ende strijden der woerden, wt die welcke comen nydicheden, kijuagien, blasphemien, quaede vermoeden,

5

disputacien der menschen die verdoruen van verstande sijn, ende die vander waerheyt berooft sijn, ⁺meynende dat ghewin Gods diensticheyt is.

+ B

6

Maer een groot ghewin is die Godts diensticheyt ende hen te laten ghenoeghen.

+ 7

Want wy en hebben niet ghebracht in dese werelt, tes ooc sonder twijfel dat wy van hier niet wech draghen en moghen.

8

Maer hebbende voetsele, ende daer wy mede ghedect moghen worden, hier mede laet ons te vreden sijn.

9

Want die rijck willen worden, die vallen in becoringhe ende in den strick des duyuels, ende in veel onnutte ende scadelijcke begheerten, die de menschen doen versincken in die doot ende verdoemenisse.

10

Want die wortel van alle quaet is die ghiericheyt, die welcke sommighe menschen begheerende hebben ghedoelt van tghelooue, ende hen seluen ghesteken in vele smerten.

11

Maer ghy o mensch Godts vliet dese dinghen. Maer volcht rechtuerdicheyt, Godts diensticheyt, ghelooue, liefde, verduldicheyt, saechtmoedicheyt.

12

⁺Strijdt eenen goeden strijdt des gheloofs, aengrijpt dat eewich leuen waer toe ghy gheroepen sijt, ende hebt beleden een goede belijdinghe voer veel ghetuyghen.

+ C

13

Ick ghebiede v voer Gode diet al leuende maect, ende voer Christo Iesu, die onder Pontio Pilato ghetuycht heeft een goede belijdinghe,

14

dat ghy onderhoudt tghebodt sonder vlecke, omberispelijck, tot die aencoemst ons Heeren Iesu Christi,

* 15

Den welcken te sijnen tijden sal toonen die salighe ende alleen machtighe coninck der coninghen, ende Heere der Heeren,

16

die alleene heeft die onsterffelijcheyt, ende woont in dlicht daermen niet aencomen en can, den welcken gheen mensch ghesien en heeft, maer oock niet sien en mach, den welcken sij eere ende eewich rijck Amen.

+ 17

⁺Den rijcken van deser werelt ghediedt, dat sij gheen hoouerdich gheuoelen en hebben, noch en hopen op die onsekerheyt der rijcdommen, maer inden leuenden Godt (die ons alle dinghen verleent oueruloedelijck om te ghebruycken)

+ D

18

wel te doen, rijck te worden in goede wercken, lichtelijck te gheuen, mede te deylen,

19

te vergaderen

[p. *893]

voer hen seluen een goet fundament teghen den toecomende tijt, op dat sij vercrijghen moghen het warachtich leuen.

20

O Timothee bewaert den pant die v betrout is, scouwende die vreemde nieuwicheyt der woerden, ende die wedersegghinghen van die valsche beroemde conste

21

die welcke die sommighe belouende sijn vanden ghelooue gheuallen. Die gratie sij met v. * AMEN.

Hier voleyndt dierste Epistel van Sinte Pauwels tot Timotheum.