Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺Maer den gheest seyt openlijck, dat in die laetste tijden die sommighe sullen aftreden vanen ghelooue, luysterende nae die gheesten der dolinghen, ende leeringhen der duyuelen,

+ A

2

in gheueynstheyt, loghenen sprekende, hebbende hen conscientie metten brant yser gheteekent

3

ghebiedende niet te houwen, ende te deruen spijsen die Godt ghescapen heeft om te nutten met dancbaerheyt den gheloouighen, ende den ghenen die de waerheyt ghekent hebben.

4

Want alle Godts creatuere is goet, ende daer en is niet te verworpen dat met dancbaerheyt ghenut wort.

5

⁺Want het wort gheheylicht doer dwoert Godts ende doer tghebedt.

+ B

6

Dese dinghen den broeders voerlegghende suldy wesen een goet dienaer Christi Iesu, opgheuoet met die woerden des gheloofs, ende der goeder leeringhen die ghy nae gheuolcht hebt.

7

Maer die onnutte ende quenen clappinghen scouwet, maer oeffent v seluen tot die Godts diensticheyt.

8

Want die lichamelijcke oeffeninghe is tot luttel bequaem, maer die Gods diensticheyt is tot alle dinghen nut, ⁺hebbende die belofte des leuens dat nu is, ende des gheens dat toecomende is.

+ C

9

+ Het is een ghelooffelijck woert ende weerdich datmen in alle manieren ontfanghe.

10

Want daer in arbeyden wy, ende worden vermalendijt, want wy hopen in den leuenden Godt die een salichmaker is van allen menschen, maer alder meest der gheloouigher.

11

Dese dinghen ghebiedt ende leert,

[p. *892]

12

Niemant en versmade v Ioncheyt, maer weest een exempel der gheloouigher in dwoert, in wandelinghe, in liefde, int ghelooue, in suyuerheyt.

13

Tot dat ick come soo weest neerstich int lesen, int vermanen, ende int leeren.

14

En wilt niet versuymen die gratie die in v is, die v ghegeuen is door die prophetie, metten oplegghen van die handen des priesterschaps.

15

Dese dinghen ouerdenct, hier mede gaet omme, op dat uwen voertganc eenen yeghelijcken kenlijck sij,

16

Hebt acht op v seluen ende op die leeringhe, blijft volherdich daer in, want dit doende suldi v seluen salich maken, ende die ghene die v hooren.