Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺HEt is een gheloouelijc woert. Eest dat iemant een bischops officie begheert, die begheert een goet werck.

+ A

2

Daer om moet een bischop wesen omberispelijc, maer eender huysvrouwen man, sober, verstandich, verciert met goede seden, eerbaer, gheerne herberghende, gheleert,

3

gheen wijnsuyper, gheen vechter, maer matich, gheen kijuer, niet ghierich,

4

sijn huys wel regerende, hebbende onderdanighe kinderen met alle suyuerheyt.

5

⁺Maer eest dat iemant sijn huys niet en can gheregeren, hoe sal hy die kercke Gods besorghen?

+ B

6

gheen niewelinck int gelooue, op dat hy opghehauen in houerdie niet en valle in des lasteraers ordeel.

7

Oock moet hy een goet ghetuyghenis hebben van die ghene die buyten sijn, op dat hy niet en valle in eenighe scandelijcheyt ende in des duyuels strick.

8

Die Diakenen moeten desghelijcs ooc wesen eerbaer, niet met twee tonghen sprekende, niet ghewent veel wijns te drincken, ⁺niet ghierich nae eenich scandelijck ghewin,

+ C

9

hebbende die verborghentheyt des gheloofs in een puer conscientie.

10

Maer dese laet oock ierstmael ondersocht worden, ende alsoo sullen sij dienen gheen groot misdaet hebbende.

11

Die vrouwen moeten desghelcijs wesen scamel, niet lasterende, sober, ghetrouwe in alle dinghen.

12

Die Diaconen laet wesen maer eender vrouwen mans, die hen kinderen wel regeren, ende hen huysen.

13

Want soe wie wel dienen, die sullen eenen graet voer hen seluen crijghen, ⁺ende veel betrouwens int ghelooue, dwelck is in Christo Iesu.

+ D

14

Dese dinghen scrijue ick v, hopende dat ick corts tot v comen sal,

15

maer eest dat ick vertoeue, op dat ghy dan weten soudt, hoe dat ghy moet int huys Godts verkeren welck is die kercke des leuenden Godts, een columne ende vasticheyt der waerheyt.

16

Ende openbaerlijck eest een groote verborghentheyt der goedertierenheyt, dat gheopenbaert is int vleesch, gherechtuerdicht is in den gheest, dat den enghelen vertoont is, den heydenen ghepreect is, ghelooft is in die werelt, opghenomen is in die hemelen.