Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

+ 1

⁺DAer om bidde ick, datmen ten iersten sal doen smeekinghen, biddinghen, begheringhen, dancsegghinghen, voer alle menschen,

+ A

2

voer coninghen, ende voer alle die in hoocheyt sijn, op dat wy een gherust ende stille leuen moghen leyden, in alle godertierenheyt ende suyuerheyt,

3

want dat is goet ende aenghenaem voer onsen salichmaker Godt,

4

die wilt dat alle menschen souden salich worden, ende ter kennissen der waerheyt comen.

5

⁺Want daer is een Godt, ende een middelaer tusschen Godt ende die menschen te weten die mensch Christus Iesus,

+ B

6

die sij seluen tot een verlossinghe heeft ghegheuen voer een ieghelijck. Wiens ghetuyghenis te sijnen tijden versterct is,

7

waer in ick ghestelt ben een predicant ende Apostel (Ick seg die waerheyt ick en lieghe niet) een leeraer der heydenen int ghelooue ende in die waerheyt.

* 8

⁺Daer om wil ick dat die mannen sullen bidden in alle plaetsen, opheffende suyuer handen sonder tornicheyt ende twisticheyt.

+ C

9

Desghelijck ooc dat die vrouwen sullen sijn in tamelijck habijt, met scamelheit ende soberheyt haer seluen vercierende, niet met ghevlochten haire, oft met gout oft peerlen, oft met costelicken cleede,

10

maer soe dat betaemt den vrouwen die Gods dienst openbaerlijck belijden doer goede wercken.

11

Een vrouwe leere in stillicheyt, ⁺met alle onderdanicheyt.

+ D

12

Maer ick en laet der vrouwen niet toe te leeren, oft douerheyt ouer den man te hebben, maer te wesen in stillicheyt.

13

Want Adam was dierste ghescapen, daer nae Heua,

14

ende Adam en is niet verleyt gheweest, maer die vrouwe is verleyt gheweest in die ouertredinghe.

15

Maer sij sal salich worden doer dat voert brenghen der kinderen, eest dat die ghestadich blijuen int ghelooue, ende in die liefde, ende heylichmakinghe met soberheyt.