Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

+ 1

⁺PAULUS een Apostel Iesu Christi, na tghebodt Gods des salichmakers, ende Christi Iesu onser hopen,

+ A

2

Timotheo den beminden sone int gheloue, sij gratie ende bermherticheyt, ende vrede van Godt den vader, ende Christo Iesu onsen Heere.

3

Alsoo ick v ghebeden hebbe dat ghy te Ephesen blijuen soudt, doen ick ghinck in Macedonien, op dat ghy ghebieden soudt den sommighen dat sij anders niet leeren en souden

4

noch niet letten en souden op die fabulen oft oneyndelijcke registeren van gheslachten, ⁺die meer twists aenbrenghen dan Godts ghestichticheyt, die int ghelooue is.

+ B

5

Maer deynde des ghebodts is die liefde van een puer herte, ende goede conscientie, ende ongheueynsden ghelooue,

6

van die welcke die sommighe afdolende sijn ommeghekeert tot onnutten clap,

7

willende leeraers der wet sijn, niet verstaende, noch tghene dat sij spreken, noch tghene dat sij voer waer segghen.

8

Maer wy weten wel dat die wet goet is, eest datse iemant te recht ghebruyct,

9

dat wetende dat die wetniet en is ghestelt den rechtuerdighen, maer den ongherechtighen ende den onghehoorsamen, den ongoddelijcken, ende den sondaren den quaet doenders, ende den besmetten, ⁺den vader moorders ende moeder moorders, den dootslaghers,

+ C

10

den hoereerders, den mans misbruyckers, der menschen dieuen, den loghenaers, ende den meyneedighen, ende soe wat anders der saligher leeringhen contrarie is,

11

die nae deuangelie is, van die glorie des salighen Godts, dwelck my betrout is.

* 12

Ick danck hem die my versterct heeft, Christum

[p. *891]

Iesum onsen Heere, dat hy my voer ghetrou gheacht heeft, stellende in den dienst,

13

die te voren gheweest hebbe een blasphemeerder, ende een veruolgher, een spijt doender, maer ick heb Godts bermherticheyt vercreghen, om dat ict onwetende ghedaen hebbe in die ongheloouicheyt.

14

Maer die gratie ons Heeren heeft ouervloedich gheweest metten ghelooue ende liefde die in Christo Iesu is.

15

+ Tes een gheloouelijc woert ende weerdich in alle manieren tontfanghen dat Christus Iesus ghecomen is in dese werelt om die sondaers salich te maken. ⁺Van die welcke ic dierste ben.

+ D

16

Maer daer om heb ick bermherticheyt vercreghen, om dat Christus in my iertsmael toonen soude alle verduldicheyt, tot een onderwijsinghe der gheender die hem gheloouen sullen ten eewighen leuen.

17

Maer den onsterffelijcken coninck der eewicheyt, den onsienlijcken eenighen Godt, sij eere ende glorie, van eewicheyt tot eewicheyt Amen.

* 18

Dit ghebodt beuele ick v sone Timothee, nae die voergheleden prophetien ouer v, dat ghy daer inne strijt eenen goeden strijdt,

19

hebbende tghelooue ende een goede conscientie, die welcke sommighe verstooten hebbende, sijn van tghelooue ghedoelt.

20

Van die welcke is Hymeneus ende Alexander die ic satanas ouergheleuert hebbe, op dat sij leeren souden niet te blasphemeren.