Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .iiij. Capittel.

+ 1

⁺DAer om voertaen broeders bidden wy v ende smeeken in den Heere Iesu, dat ghi, ghelijck ghi van ons ontfanghen hebt, hoe dat ghi behoirt te wandelen, ende Godt te behagen, als ghi ooc wandelt, noch ouervloedigher sijn wilt.

+ A

2

Want ghy weet wel wat gheboden dat ic v heden ghegheuen hebbe doer den Heere Iesum.

3

Want dit is den wille Gods v lieder heylichmakinghe, dat ghy v onthoudet van oncuyscheyt,

4

op dat een ieghelijck van v lieden wete sijn vat te besitten in heylichmakinghe ende eere,

5

niet in beruerten van wellusticheden, ghelijck ooc die heydenen doen die Godt niet en kennen,

6

ende niemant en ouervalle oft en bedrieghe in eenighe sake sijnen broeder. ⁺Want die Heere is een wreeker van alle desen, ghelijck wy v te voren gheseyt hebben, ende betuycht.

+ B

7

Want Godt en heeft ons niet gheroepen ter onreynicheyt, maer ter heylichmakinghen.

* 8

Daer om soe wie dese dinghen versmaet, die en versmaet gheenen mensche, maer Godt, die welcke oock sijnen heyleghen gheest ghegheuen heeft in ons.

9

+ Maer van die liefde der broederlijcheyt en hebben wy gheen noodt v te scrijuen. Want ghy hebt selue van Gode gheleert, dat ghy malcanderen soudt lief hebben.

10

Want dat doedi voerwaer aen alle die broeders, in gheheel Macedonien, ⁺maer wy bidden v broeders dat ghy noch oueruloedigher wesen moecht, ende dat ghy neersticheyt doet om gherust te sijne,

+ C

11

ende dat ghy neersticheyt doet om gherust te sijne, ende dat ghy v eyghen dinghen doet, ende werct met uwen handen, ghelijc wy v lieden gheboden hebben, ende dat ghi eerbaerlijc soude wandelen teghen die ghene die buyten sijn, ende dat ghy van niemanden iet en begheert.

12

+ Maer wy en willen niet broeders dat v ombekent sij vanden slapenden, op dat ghi niet bedroeft en wort, ghelijck die andere die gheen hope en hebben.

13

Want eest dat wy gheloouen dat Iesus ghestoruen is ende verresen, alsoo sal oock Godt die ghene die ontslapen sijn doer Iesum, tsamen brenghen met hem.

14

⁺Want dat segghen wy v lieden in dwoert des Heeren, dat wy die leuen ende ouerbleuen sijn, in die toecoemst des Heeren, niet en sullen voer comen die ghene die ontslapen sijn.

+ D

15

Want die Heere selue sal int ghebodt ende in die stemme des archangels ende int trompet Gods vanden hemel comen, ende die dooden die in Christo sijn, sullen dierste opstaen.

16

Daer nae wy die leuen sullen, die ouerblijuen sullen, die sullen tsamen opghenomen worden met hen in die wolcken te ghemoete Christo in die locht, ende alsoe sullen wy altijt metten Heere wesen.

17

Aldus vertroost malcanderen met desen woerden.