Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .v. Capittel.

+ 1

⁺MAer van die tijden ende stonden broeders en behoefdi niet dat wy v scrijuen.

+ A

2

Want ghy weet selue wel neerstelijck dat den dach des Heeren, alsoo comen sal ghelijck eenen dief inder nacht,

3

Want als sij segghen sullen, het is vrede het is sonder sorghe, dan sal hen onuersienlijcken die

[p. *889]

bederffenisse ouercomen, ghelijck die pijne eender bevruchter vrouwen, ende sij en sullens niet ontvlieden.

4

Maer ghy broeders en sijt in die duysternissen niet, dat v lieden dien dach als een dief beuanghe.

5

+ Want ghy sijt alle kinderen des lichts, ende kinderen des dachs * Wy en sijn des nachts oft der duysternissen niet.

6

Daer om en laet ons niet slapen ghelijck oock die andere. Maer laet ons waken ende sober sijn.

7

⁺Want die slapen die slapen des nachts, ende die droncken sijn, die sijn des nachts droncken.

+ B

8

Maer laet ons die des daechs sijn, sober wesen ghewapent met dat pansier des gheloofs, ende der liefden, ende metten helm die hope der salicheyt,

9

want Godt en heeft ons niet ghestelt ter gramscappen, maer tot een vercrijghen der salicheyt, door onsen Heere Iesum Christum,

10

die voer ons ghestoruen is, op dat wy (tsij oft wy waken oft slapen) tsamen met hem moghen leuen.

11

Daer om soo vertroost malcanderen, ende sticht malcanderen alsoo ghy ooc doet.

* 12

⁺Ende wy bidden v broeders, dat ghy kent die ghene die onder v lieden arbeyden ende v ouerste sijn inden Heere ende die v vermanen,

+ C

13

dat ghy die ouervloedelijcker houdet in die liefde, om hen werck hebt vrede met hen.

+ 14

Ende wy bidden v broeders straeft die ongherustighe, troost die cleynmoedighe, verdraecht die crancke, weest lijdtsamich tot een ieghelijck.

15

Siet toe dat niemant quaet voer quaet iemanden en loone, maer volcht altijt dat goet is tot malcanderen ende tot eenen ieghelijcken.

16

Weest altijt blijde.

17

Bidt sonder ophouden.

18

Danct in alle dinghen. Want dit is den wille Gods, in Christo Iese, in v allen,

19

Den gheest en wilt niet wt blusschen.

20

Die prophetien en wilt niet versmaden.

21

Maer proeft alle dinghen, ⁺houdt dat goet is.

+ D

22

Van allen quaden schijn wacht v lieden.

23

Ende Godt des vredes wil selue v gheheel heylich maken, op dat uwen gheheelen gheest, ende ziele ende lichaem omberispelijck tot die toecoemst ons Heeren Iesu Christi bewaert mach worden.

* 24

Hy is ghetrouwe die v lieden gheroepen heeft, diet oock doen sal,

25

Broeders bidt voer ons.

26

Groet alle die broeders met eenen heylighen cusse.

27

Ick beswere v lieden by den Heere, dat desen brief ghelesen worde alle den heyleghen broeders.

28

Die gratie ons Heeren Iesu Christi sij met v AMEN.

Hier voleynt dierste Epistel van Sinte Pauwels totten Thessalonicensen.