Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .iij. Capittel.

1

⁺DAer om dit niet langher verdraghende heuet ons belieft tot athenen te blijuen alleen,

+ A

2

ende wy hebben ghesonden Timotheum onsen broeder, ende den dienaer Gods int euangelie Christi, om v te verstercken ende te vermanen om v ghelooue,

3

op datter neimant beroert en worde in dese tribulacien. Want ghy weet selue wel dat wy daer tot ghestelt sijn.

4

Want doen wy by v lieden waren, soe seyden wy v te voren, dat wy tribulacien lijden souden, ghelijc dat oock ghesciet is, ende ghy wel weet.

5

⁺Daer om ick dit niet langher verdraghende, heb ghesonden om te weten v ghelooue, op dat hy v bijauontueren niet ghetempeert en hadde die ghene die tempteert, ende dat onsen arbeyt te vergheefs waer gheworden.

+ B

6

Maer nu als Timotheus tot ons van v lieden ghecomen is, ende ons vercondicht heeft v lieder ghelooue ende liefde, ende dat ghy altijt goede ghedenckenisse van ons hebt, begherende ons te siene, lijck wy oock v lieden,

7

⁺daer om hebben wy broeders troost ghecreghen in v lieden, in allen onse noot, ende tribulatie, doer v ghelooue,

+ C

8

Want nu leuen wy, eest dat ghy staet inden Heere.

+ 9

Want wat danck moghen wy Gode werderom gheuen voer v lieden, in alle blijscap waer mede wy blijde sijn om v lieden voer onsen Godt,

10

nacht ende dach ouervloedelijcker biddende, dat wy mochten v aensicht sien, ende dat wy mochten volbringhen dat uwen ghelooue ghebreect?

11

⁺Maer hy onse Godt ende vader ende onse Heere Iesus Christus scicke onsen wech tot v lieden.

+ D

12

Maer die Heere wil v lieden vermenichfuldighen ende oueruloedich maken die liefde tot malcanderen, ende tot allegader, ghelijc wy ooc tot v lieden sijn,

13

om te verstercken uwe herten sonder clachte in heylicheyt voer Godt ende onsen vader, in die toecoemst ons Heeren Iesu Christi met allen sijnen heyligen Amen.