Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺VVant ghy weet selue broeders onsen inganck tot v lieden, dat dien niet te vergheefs gheweest en is,

+ A

2

maer als wy te voren gheleden hadden, ende ons versmaetheyt aenghedaen was (ghelijck ghy wel weet) in Philippen, soe hebben wy noch betrouwen ghehadt in onsen Godt, te spreken tot v het euangelie Gods met groote sorchuuldicheyt.

3

Want onse vermaninghe en was van gheen dolinghe, noch van eenighe onsuyuerheyt, noch in bedroch.

4

Maer ghelijck wy gheproeft sijn van Godt, dat ons soude betrout worden deuangelie, alsoo spreken wy dat, niet als den menschen behaghende, maer Gode die onse herten proeft,

5

want wy en hebben te gheenen tijde omme ghegaen met die flatteer sprake (alsoo ghy wel weet) noch in oirsake der ghiericheyt. ⁺Godt is dies ghetuyghe,

+ B

6

noch soeckende van die menschen glorie, noch van v lieden, noch vanden anderen.

7

Als wy v hadden moghen lastich wesen, als Christus Apostelen, maer wy sijn gheworden cleyn kinderen int midden van v lieden, als oft een voestere voesterde haer kinderen.

8

Alsoo

[p. *888]

v lieden begheerende met grooter begheerten wilden wy v leueren niet alleen het euangelie Godts, maer oock onse zielen. Want ghy sijt ons seer lief gheworden.

9

Want ghy sijt ghedachtich broeders ons arbeyts, ende vermoetheyts, nacht ende dach werckende op dat wy niemanden van v lieden verlasten en souden, hebben wy Godts euangelie v lieden ghepreect.

10

Ghi sijt des ghetuyghen ende Godt, hoe heylichlijck ende rechtuerdelijck ende sonder clachte wy tot v lieden die ghelooft gheweest hebben,

11

ghelijck ghy wel weet, hoe dat wy eenen ieghelijcken van v lieden (als een vader sijn kinderen) biddende v lieden ende troostende,

12

betuycht hebben dat ghy wandelen soudt weerdelijck Gode, die v gheroepen heeft in sijn rijck ende glorie.

13

⁺Daer om dancken wij oock Gode sonder ophouden, want doen ghy van ons ghehoort hadt het woert van Godts ghehoor, soo hebdi dat ontfanghen, niet als een woert der menschen, maer (ghelijck dat warachtelijck is) Het woert Godts, die in v lieden werct die ghelooft hebt.

+ C

14

Want ghy broeders sijt gheworden nauolghers van Gods kercken, die in Iudeen sijn, in Christo Iesu, want ghy lieden hebt die selue dinghen oock gheleden van v maghen, ghelijck sij oock gheleden hebben van die Ioden,

15

die welcke oock den Heere Iesum ghedoot hebben, ende die propheten, ende ons veruolcht hebben, ende sij en behaghen Gode niet, ende allen menschen sijn sij contrarie,

16

verbiedende ons den heydenen te spreken, dat sij souden salich worden, om dat sij hen sonden altijt volbringhen souden. Want die gramscap is ouercomen op hen lieden totten eynde

+ 17

⁺Maer wy broeders berooft van v lieden een wijle nae den aensicht niet nae der herten, hebben ouervloedelijcker ghehaest v aensicht te sien met grooter begheerten,

+ D

18

want wy hebben ghewilt tot v comen, ick emmer Paulus eens ende anderwerf, maer satanas heeft ons belet.

19

Want welck is onse hope, oft blijscap, oft croone der glorien? En sijdi ghy dat niet voer onsen Heere Iesum Christum, in sijn toecoemste?

20

Want ghy sijt ons glorie ende blijscap.