Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PAULUS ende Siluanus ende Timotheus, der kercke van die Thessalonicensen, in Gode den vader ende den Heere Iesu Christo.

+ A

2

Gratie sij v ende vrede. + Wy dancken Gode altijt voer v allen, v lieder ghedenckenisse makende in onse ghebeden sonder ophouden,

3

ghedachtich wesende des wercs ws gheloofs, ⁺ende arbeyts ende der liefden, ende van die verduldicheyt der hopen ons Heeren Iesu Christi, voer onsen Godt ende vader,

+ B

4

wetende broeders van Gode bemint v verkiesinghe,

5

dat ons Euangelie niet en is gheweest tot v lieden allen int woert, maer in die cracht ende in den heylighen gheest, ende in grooter volheden, ghelijckerwijs ghy weet hoedanich dat wy gheweest hebben onder v lieden, om uwen willen.

6

⁺Ende ghy sijt onse nauolghers gheworden, ende des Heeren, ontfanghende dwoert in veel tribulacien, met die blijscap des heylichs gheests.

+ C

* 7

Alsoe dat ghy gheworden sijt een exempel alle den gheloouighen in Macedonien ende in Achaien.

8

Want van v lieden is dwoert des Heeren vermaert gheworden, niet alleen in Macedonien, ende Achaien, maer in alle plaetsen is v ghelooue (dwelck tot Godt is) voertghegaen, alsoo dat ons van gheenen noode en is iet te spreken.

9

⁺Want sij vercondighen van ons hoedanighen inganck dat wy ghehadt hebben tot v lieden, ende hoe dat ghy bekeert sijt tot Godt van die afgods beelden, om te dienen den leuenden ende warachtighen Godt,

+ D

10

ende te verbeyden sijne sone van die hemelen (den welcken hy verwect heeft vanden dooden) Iesum die ons verlost heeft van die toecomende gramscap.