Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺VOortaen mijn broeders verblijdt v inden Heere. Want het selue v te scrijuen en is my voerwaer niet verdrietelijck, ende v lieden eest nootelijck.

+ A

2

Siet die honden, siet die quade wercluyden, siet die versnijdinghe.

3

Want wy sijn die besnijdenisse die doer den gheest Gode dienen, ende glorieren in Christo Iesu, ende niet int vleesch betrouwen hebbende,

4

hoe wel dat ick oock mocht betrouwen in den vleesche hebben. Eest datter iemant scijnt te betrouwen int vleesch, dat mach ick bet,

5

die besneden ben opden achtsten dach, wt Israels afcoemste, van Beniamins gheslachte, een Hebreussch vanden Hebreusschen gheboren, nae die wet een Pharizeus,

6

nae die neerstighe liefde, veruolghende die kercke Gods, nae die gherechticheyt die in die wet is hebbende gheleeft onstraffelijck.

7

⁺Maer die dinghen die my winninghen gheweest hebben, die heb ick ghehouden om Christus wille voer verlies.

+ B

8

Maer nochtans acht ick alle dinghen verlies te sijne om die ouer hooghe kennisse Iesu Christi ons Heeren, om den welcken ick alle dinghen voer verlies gheacht hebbe, ende acht die als dreck, om dat ick Christum soude moghen winnen,

9

ende dat ick mach ghevonden worden in hem niet hebbende mijn rechtuerdicheyt die wter wet is, maer die ghene die wt Christus ghelooue is, die rechtuerdicheyt die van Gode is int ghelooue,

10

om hem te kennen, ende die cracht sijnder verrijsenissen, ende die ghemeynscap sijns lijdens ghelijck ghemaect sijnder doot,

11

oft ick eenichsins mocht ontmoeten der verrijsenissen die daer is van die dooden.

12

⁺Niet dat ict nu begrepen hebbe oft dat ick nu volmaect ben, maer ick drijue daer nae oft ick mocht vol begrijpen int tghene daer ick in volbegrepen ben van Christo Iesu.

+ C

13

Broeders ic en laet my niet voerstaen dat ict volbegrepen hebbe. Maer een dinck (segghe ick) want voerwaer tghene dat voer by is verghetende, maer tot het ghene dat voer is my seluen wtstreckende,

14

volghe ick tot dat voerghestelt teeken, tot den prijs vanden hooghen roep Gods in Christo Iesu.

15

Daer om hoe vele datter onser volcomen sijn laet ons dit gheuoelen hebben, ende eest dat ghy iet anders gheuoelt, dat heeft v Godt ooc gheopenbaert.

16

Maer nochtans tghene daer wy toecomen sijn, dat wy een gheuoelen hebben souden, laet ons in die selue regele blijuen.

+ 17

⁺Weest mijn nauolghers broeders, ende neemtse waer die alsoo wandelen ghelijck ghy hebt onse maniere.

+ D

18

Want daer wandelter vele van den welcken ic v dicmael seyde (maer nu segghe ict oock al weenende) dat sij sijn vianden des cruys Christi,

19

der welcker eynde is die verdoemenisse, der welcker Godt is den buyck, ende hen glorie is tot haerder scanden, die tot eertsche dinghen ghesint sijn.

20

Maer onse wandelinghe is in die hemelen. Van waer wy oock den salichmaker verwachten onsen Heere Iesum Christum,

21

die hermaken sal het lichaem onser snootheyt, dat ghelijck makende den lichaeme van sijnder claerheyt, nae twercken zijnder cracht waer mede hy oock alle dinghen sij seluen machtich is onderdaen te maken.