Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

[p. *884]

1

⁺DAer om isser eenige vertroostinghe in Christo, isser eenich solaes der liefden, isser eenighe ghemeynscap des gheests, sijnder eenighe binnenste der bermherticheden,

+ A

2

soe veruult mijn blijscap, dat ghy een gheuoelen moecht hebben, een liefde hebbende, eendrachtich, een gheuoelen hebbende,

3

niet doende doer crijch, noch doer ydel glorie, maer in ootmoedicheyt deen dander hoogher achtende

4

niet elcke aenmerckende dat sijne is, maer tghene dat der anderen is.

+ 5

Want ghevoelt in v lieden tghene dat ooc is in Christo Iesu.

6

Die welcke doen hy in Godts wesen was en heuet voer gheen roof gheacht Gode ghelijck te sijn,

7

maer hy heeft sij seluen vernedert eens knechts ghelijckenisse aen nemende, in die ghelijckenisse der menschen gheworden ende van wesen gheuonden als een mensch.

8

Hy heeft sij seluen verootmoedicht, onderdanich gheworden sijnde totter doot toe, ende dat tot die doot des cruys.

9

⁺Daer om heeft hem Godt verhauen, ende heeft hem ghegheuen eenen naem die bouen alle namen is,

+ B

10

op dat inden naem Iesu souden ghebuycht worden alle knyen der hemelscher, der eertscher, ende der helscher creatueren,

11

ende dat alle tonghe soude belijden, dat die Heere Iesus Christus is, in die glorie Godts des vaders.

* 12

Aldus mijn alderliefste (alsoo ghy altijt onderdanich hebt gheweest) niet alleen in mijn teghenwoerdicheyt, maer veel meer nu in mijn afwesen, werct met vreese ende anxt uwe salicheyt.

13

Want tes Godt die in v lieden werct beyde, het willen ende het volbringhen nae den goeden wille.

14

Ende alle dinghen doet sonder murmuratien, ende twijfelinghen,

15

op dat ghy wesen moecht sonder clachte, ende simpele kinderen Gods, omberispelijck, int midden der quader ende verkeerder natien, onder die welcke ghy lichtet als lichten, in die werelt,

16

het woert des leuens inhoudende, tot mijnder glorien, in den dach Christi, dat ic niet te vergheefs gheloopen en hebbe, noch te vergheefs ghearbeyt.

17

⁺Maer eest dat ick tot een offerande ghedoot worde opt sacrificie, ende opden dienst ws gheloofs, soo ben ick blijde, ende verblijde my met v allen.

+ C

18

Desghelijcs verblijdt v ghy oock, ende verblijdt v met my.

19

Maer ick hope inden Heere Iesu dat ick Timotheum cortelinghe tot v lieden senden sal, op dat ick goets moets mach wesen, wetende hoe dat met v lieden is.

20

Want ick en heb niemanden soe seere mijns sins, die met puerder begheerten voer v lieden sorchuuldich is.

21

Want sij soecken alle dat hare is, ende niet dat Iesu Christi is.

22

Ende verstaet sijn proeuinghe, want als een kint sijnen vader alsoo heeft hy met my ghedient int euanghelie.

23

Aldus hope ick desen te senden tot v lieden, ter stont als ick sal ghesien hebben hoet met my staet.

24

Maer ick heb betrouwen inden Heere, dat ick oock tot v lieden comen sal cortelinghe.

25

⁺Ende het heeft my nootelijck ghedocht Epaphroditum mijnen broeder ende medewercker, ende medestrijder, ende uwen Apostel, ende eenen dienaer mijnder nootdrufticheyt, tot v te seynden.

+ D

26

Want voerwaer hy begheerde v allen, ende hy was droeuich om dat ghi ghehoort hadt, dat hy sieck gheweest hadde.

27

Want hy ooc sieck gheweest heeft totter doot toe, maer Godt heeft sijnder ontfermt, ende niet alleen sijnder, maer oock mijnder, op dat ic deen droefheyt op dander niet hebben en soude.

28

Daer om heb ick hem te haestelijcker ghesonden, op dat ghy hem ghesien hebbende, wederom moecht blijde sijn, ende dat ic sonder droeffenis soude wesen.

29

Daer om ontfanct hem met alle blijscap in den Heere, ende alsulcke hebt in eeren.

30

Want om Christus werck is hy totter doot toe by ghecomen, leuerende sijn ziele op dat hy volbringhen soude tghene datter van v lieden weghen ghebracht aen mijnen dienst.