Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PAULUS ende Timotheus dienaers Iesu Christi, alle den heyleghen in Christo Iesu die te Philippen sijn, metten bischoppen ende diakenen,

+ A

2

Gratie sij v ende vrede van Gode onsen vader, ende den Heere Iesu Christo.

3

Ick dancke mijnen Godt in alle uwer ghedenckenisse

4

(altijt in alle mijn ghebeden voer v allen met blijscap biddende)

5

van uwer ghemeynscappen in deuangelie Christi, van den iersten dach tot noch toe.

+ 6

Betrouwende dat selue, dat die ghene die in v begonnen heeft het goet werck, dat die dat oock sal volbrenghen tot inden dach Christi Iesu.

7

Ghelijck my rechtuerdich is dat te gheuoelen van v allen, om dat ick v lieden hebbe int herte, ende in mijn banden, ende int verantwoerden ende int verstercken van deuangelie, dat ghy alle medeghesellen sijt van mijnder blijscap.

8

Want Godt is my ghetuyghe, hoe dat ick v alle gader begheere in dat binnenste Iesu Christi.

9

Ende ick bidde dit, dat v liefde meer ende meer mach oueruloedich worden in kennisse, ende in alle verstandicheyt,

10

op dat ghy moecht beuinden die beste dinghen, op dat ghy moecht wesen ombeulect, ende sonder misdaet tot den dach Christi,

11

⁺veruult met die vrucht der rechtuerdichteyt doer Iesum Christum, ter glorien en ten loue Gods.

+ B

* 12

Maer ick wil dat ghy weet broeders dat die dinghen die my aengaen, sijn meer ghecomen tot vorderinghe van deuangelie.

13

Alsoe dat mijn banden kenlijck gheworden sijn in Christo, in alle dat rechthuys ende in alle die ander plaetsen,

14

alsoo datter veel van den broeders inden Heere, betrouwen hebbende in mijn banden, veel te cloeker gheweest hebben om sonder vreese het woert Godts te spreken.

15

Die sommighe preken Christum voerwaer wt nydicheyt, ende wt twisticheyt, maer die sommighe wt eenen goeden wille.

17[16]

Die sommighe wt liefden, wetende dat ick int bescermen van deuanghelie ghestelt ben.

16[17]

Maer die sommighe vercondighen Christum wt crijch, niet puerlijck, meynende dat sij een ghedranghe verwecken sullen tot mijnen banden.

18

Maer wat leyt daer aen? Als in alle manieren tsij oft doer een ocsuyn, ⁺oft doer die waerheit Christus vercondicht wordt daer in verblijde ick my oock, ende ick salder oock noch blijde om sijn.

+ C

19

Want ick weet wel dat my dit comen sal ter salcicheyt, doer v ghebedt, ende doer die bijstandicheyt des gheest Iesu Christi,

20

nae mijn verwachtinghe ende mijn hope, dat ick nerghers in bescaemt en sal worden, maer in alle betrouwen ghelijck altijts sal Christus nu ooc groot gemaect worden in mijn lichaem tsij doert leuen tsij doer die doot.

21

Want Christus is mi dleuen ende het steruen ghewin.

22

Maer eest dat int vleesch te leuen mi hier een vrucht des wercs is, soe en weet ic ooc niet wat ic kiesen mocht.

23

Want ic worde benauwet van tween, hebbende begheerte om ontbonden te sijne, ende met Christo te wesen, het welcke is seer veel beter,

24

maer te blijuen in vleesch is nootelijck om uwen wille.

25

Ende dit betrouwen hebbende weet ick dat ick blijuen sal, ende ghestadelijck blijuen by v allen, ⁺tot uwer vorderinghen ende blijscap des gheloofs,

+ D

26

op dat v mede verblijden mach oueruloedich worden in Christo Iesu in my, doer mijn toecoemst weder om tot v lieden.

27

Alleenlijck wandelt weerdelijck nae deuanghelie Christi, op dat, tsij als ick sal ghecomen sijn ende v sien sal, tsij dat ick niet teghewoerdich sijnde, mach van v lieden hooren, dat ghy staet in eenen gheest, eendrachtich, tsamen arbeydende voer tghelooue van deuangelie.

28

Ende en wert nerghers in veruaert van die wederpartijders, die welcke hen is een sake der verdoemenissen, maer v lieden der salicheyt, ende dat van Gode.

29

Want v lieden eest ghegheuen om Christus wille niet alleen dat ghy in hem gheloouen soudt, maer oock dat ghy voer hem lijden soudt,

30

den seluen strijdt hebbende, alsoo ghy ghesien hebt in my, ende nu ghehoort van my.