Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *885]

* Dat .iiij. Capittel.

1

⁺ALdus mijn alderliefste ende wtuercorenste broeders mijn blijscap, ende mijn croone, staet alsoo inden Heere mijn alderliefste

+ A

2

Euchodiam bidde ick, ende Synthychen bidde ick sat sij eens sins sijn inden Heere.

3

Oock bidde ick v ghy mijn oprechte medepaer helptse die met my ghearbeyt hebben int euangelie met Clementen ende die ander mijne helpers, der welcker namen sijn int boeck des leuens.

+ 4

Weest blijde inden Heere altijt, wederom seg ick weest blijde.

5

V manierlijcheyt sij kenlijck alle menschen, die Heere is nae by.

6

En weest niet sorchuuldich, maer in alle ghebeden ende smeekinghe met danck segghinghe, ⁺soe laet v begheerten kenlijck worden voer Gode.

+ B

7

Ende Gods vrede die te bouen gaet alle verstant, moet bewaren v herten, ende v verstandenissen in Christo Iesu.

* 8

Voertaen broeders al wat warachtich is, al wat cuysch is, al wat rechtuerdich is, al wat heylich is, al wat lieflijck is, al wat van goeder famen is, isser eenighe duecht, isser eenighen lof der leeringhen, dese dinghen dencket,

9

die welcke ghy ooc gheleert, ende ontfanghen, ende ghehoort ende ghesien hebt in my, sulck doet, ende Godt des vreedts sal met v wesen.

10

Ende ic heb blijde gheweest inden Heere bouen maten, dat ghy ten laetsten eens wederom herbloijet sijt om voer my te ghevuelen ghelijck ghy ooc wijlen ghevueldet, ⁺maer ghy waert becommert.

+ C

11

Dit en segghe ick niet als om der armoeden wille, want ick heb gheleert my te laten ghenoeghen in tghene daer ic in ben.

12

Ic can vernederinghe lijden, ende ick can oueruloedicheyt draghen (Ouer al ende in alle dinghen ben ick gheleert) ende versaet te sijn, ende hongher te lijden, ende oueruloedich te sijn, ende ghebreck te lijden.

13

Alle dinghen vermach ic doer hem die my versterct.

14

Maer nochtans hebdi wel ghedaen v deelachtich makende mijnder tribulatien.

15

Maer ghy Philippensen weet wel, dat int beghinsel van deuangelie, als ick ghereyst ben van Macedonien, gheen kercke met my meghedeylt en heeft in manier van ghifte ende ontfanck, dan ghy lieden alleen.

16

⁺Want ghy hebt tot Thessalonien eens ende anderwerf my tot nootdurfte wat ghesonden.

+ D

17

Niet om dat ick die ghifte soecke, maer ick soecke die vrucht oueruloedende in v rekeninghe.

18

Maer ick heb alle dinghen, ende ick ben oueruloedich, ick ben veruult, ontfanghen hebbende van Epaphrodito dat ghi ghesonden hadt, eenen rueck der sueticheyt, een aenghenaem slachofferande, Gode behaghende.

19

Maer mijn Godt veruulle alle uwe begheerten, nae sijn rijcdommen, in die glorie, in Christo Iesu.

20

Maer Gode ende onsen vadere sij glorie in die eewen der eewen Amen.

21

Groet alle heylighen in Christo Iesu.

22

V groeten die broeders die met my sijn. V groeten alle die heyleghen, maer aldermeest die van des Keysers huyse sijn.

23

Die gratie ons Heeren Iesu Christi sij met uwen gheest. Amen.

Hier voleyndt die Epistel van Sinte Pauwels totten Philippensen.