Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺DAer om weest Gods nauolghers als alderliefste kinderen

+ A

2

ende wandelt in die liefde, ghelijck Christus oock ons heeft lief ghehadt, ende heeft sij seluen ouergheleuert voer ons tot een offerande ende een slachoffer Gode tot eenen rueck der soeticheyt.

3

Maer alle oncuyscheyt, ende alle onsuyuerheyt oft ghiericheyt, en worde oock niet ghenoemt onder v lieden, alsoo den heylighen betaemt,

4

oft oneerbaerheyt, oft sotte clappernie, oft boerdelijcheyt die nerghers toe en dient, maer lieuer danchaerheyt.

5

Want weet dat verstaende, dat alle oncuyscheyt doende oft onsuyuerheit bedrijuende, ⁺oft die gierich is (dwelc is der afgoden dienst) gheen erfdeel en heeft int rijck Christi, ende Godts.

+ B

6

Niemant en verleyde v met ydele woerden. Want hier om comet die gramscap in die kinderen der wantrouwicheyt.

7

Daer om en wilt niet worden haers mede deelachtich.

8

Want ghi waert voertijts duysternissen, maer nu sijdi een licht in den Heere. + Wandelt als kinderen des lichts

9

(Want die vrucht des lichts is in alle goetheyt, ⁺ende rechtuerdicheyt, ende waerheyt)

+ C

10

ondervindende welc dat het welbehaghen Gods is,

11

ende en hebt gheen ghemeynscap niet die onvruchtbaer wercken der duysternissen, maer veel meer wiltse straffen.

12

Want dat int heymelijck van hen ghedaen wort, dats ooc leelijck om segghen.

13

Maer alle dinghen die ghestraft worden, die worden van dat licht gheopenbaert, wat alle dat gheopenbaert wort, dats licht.

14

Daer om seyt hy, Staet op die daer slaept ende verrijst vanden dooden, ende Christus sal v verlichten.

* 15

+ ⁺Daer om siet toe broeders hoe dat ghy behoedelijck moecht wandelen niet als onwijse, maer als wijse,

+ D

16

winnende den tijt, want die daghen sijn quaet.

17

Daer om en wilt niet worden onwijs, maer verstaende welck den wille Gods is.

18

Ende en wilt niet droncken worden van den wijn, daer oncuyscheyt in is, maer wort veruult metten heyleghen gheest

19

sprekende onder malcanderen met psalmen, ende lofsanghen, ende gheestelijcke liedekens, singhende, ende spelende in v herten den Heere,

20

altijt danckende voer alle inden naem ons Heeren Iesu Christi, Gode ende den vader.

21

Malcanderen onderdaen in die vreese Christi.

* 22

⁺Die vrouwen moeten haren mans onderdanich sijn, als den Heere,

+ E

23

want die man is der vrouwen hooft, ghelijck Christus thooft is vander kercken. Hy selue is die salichmaker sijns lichaems.

24

Maer ghelijck die kercke Christo onderdanich is, alsoo moeten die vrouwen haren man onderdanich sijn in alle dinghen.

25

Ghy mannen hebt lief v huysvrouwen, ghelijck Christus oock lief heeft ghehadt die kercke, ende heeft sij seluen gheleuert voer haer,

26

⁺om dat hy die soude heylich maken, suyuerende haer int doopsel des waters, doer dwoert,

+ F

27

om dat hy voer sij seluen bereyden soude een gloriose kercke niet hebbende eenighe smette oft rimpele, oft iet desghelijcs, maer dat die wesen soude heylich ende onbesmet.

28

Alsoo moeten die mans hen huysvrouwen lief hebben, als hen lichaem, die sijn huysvrouwe lief heeft, die heeft sij seluen lief.

29

⁺Want niemant en heeft oyt sijn vleesch ghehaet, maer hy voet ende onderhoudt dat, ghelijck Christus oock die kercke,

+ G

30

want wy sijn leden van sijnen lichaem, van sijnen vleessche ende van sijnen ghebeenten.

31

Daer om sal die man verlaten sijnen vader ende moeder, ende sal aen cleuen sijnder huysvrouwen, ende sij twee sullen in een vleesch sijn.

32

Dit sacrament is groot, maer ick segghe in Christo ende in die kercke.

33

Maer nochtans soe sult ghy een ieghelijck sijn huysvrouwe lief hebben ghelijck sij seluen. Maer die huysvrouwe vreese haren man.