Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .iiij. Capittel.

+ 1

⁺DAerom bidde v lieden ick gheuanghen inden Heere, dat ghy weerdelijc wandelt nae den roep daer door ghy gheroepen sijt

+ A

2

met alder ootmoedicheyt ende saechtmoedicheyt, met verduldicheyt verdraghende malcanderen in die liefde,

3

Sorchuuldich om te bewaren die eenicheyt des gheests inden bant des vreedts,

4

Een lichaem ende eenen gheest, ghelijc ghy gheroepen sijt in een hope van uwen roep,

5

Een Heere, een ghelooue, een doopsel,

6

Een Godt ende vader van alle, die daer is bouen alle, ende door alle, ende in ons allen.

* + 7

Maer eenen ieghelijcken van ons lieden is gratie ghegheuen nae die mate van Christus ghifte,

8

Daerom seyt hy. Climmende int hooghe heeft hy gheuanghen gheleyt die gheuanghenisse, ⁺hy heeft den menschen ghiften ghegheuen

+ B

9

(Maer dat hy opgheclommen is wat is dat dan dat hy ooc nederghedaelt is ten iersten in die onderste deelen der eerden?

10

Die nederghedaelt is, die selue eest ooc die opgheclommen is bouen alle die hemelen, om dat hijt al veruullen soude)

11

Ende hy heeft voorwaer ghegeuen die sommighe tot apostelen, ende die sommighe tot propheten, maer die andere tot Euangelisten, ende die andere tot herders ende leeraers,

12

tot volmakinghe der heylighen tot den wercke des diensts, ter ghestichticheyt van Christus lichaem

13

tot dat wij alle tsamen ouer een comen in die eenicheyt des gheloofs ende der kennissen vanden sone Godts, ⁺in eenen volmaecten man, in die mate des ouderdoms van Christus volcomenheyt.

+ C

* 14

Op dat wij niet en souden sijn onghestadighe cleyn kinderen ende al omme ghedreuen worden met alle winde van leeringhe, in die boosheyt der menschen, in die scalcheyt tot die bedriechlijcheyt der dolinghen,

15

maer laet ons die waerheyt doende in die liefde wassen in hem door alle din-

[p. *882]

ghen, ⁺die daer is het hooft, Christus,

+ D

16

wt welcken alle dlichaem tsamen gheuoecht ende aen een ghebonden doer alle toeuoeghinghen van den onderdienst, nae het wercken totter maten van elck let, maect den wasdom des lichaems ter ghestichticheyt van sij seluen in die liefde.

17

Daer om seg ick dit, ende ghetuyghe in den Heere, op dat ghi nu niet en wandelt als die heydenen wandelen in die ydelheyt van haren sin,

18

hebbende tverstant met duysternissen beuanghen, vervreemt van Godts leuen doer die onwetentheyt die in hen is, om die blentheyt haers herten,

19

die mishopende, hen seluen ouerghegheune hebben ter oncuyscheyt, tot volbringhen van alderley onsuyuerheyt ter giericheyt.

20

⁺Maer ghi en hebt Christum alsoo niet gheleert,

+ E

21

eest nochtans alsoe dat ghi hem ghehoort hebt, ende in hem onderwesen sijt (ghelijck die waerheyt is in Iesu)

22

Legt ghy lieden af nae die voerleden wandelinghe den ouden mensch, die verdoruen wordt nae die begheerten der dolinghen.

23

+ Maer wort vernieut met den gheest ws verstants,

24

ende doet aen den nieuwen mensch die nae Godt ghescapen is in die rechtuerdicheyt, ende heylicheyt der waerheyt.

25

Daer om aflegghende die loghene, spreect die waerheyt een ieghelijck met sijnen naesten, ⁺want wy sijn onder malcanderen leden.

+ F

26

Weest gram, ende en wilt niet sondighen, en laet die sonne niet ondergaen ouer v gramschap.

27

En wilt gheen plaetse gheuen den duyuel.

28

Soe wie ghestolen heeft, die en stele nu niet meer, maer hy arbeyde lieuer, werckende met sijnen handen dat goet is, op dat hy hebbe waer af dat hy gheuen mach den ghenen die ghebreck lijdet.

* 29

Alle quade sprake en come niet voerts wt uwen monde, maer esser eenich goet woert ter ghestichticheyt des gheloofs, ⁺op dattet gratie gheue, den ghenen diet hooren.

+ G

30

Ende en wilt niet bedroeuen den heylighen gheest Gods, inden welcken ghi gheteekent sijt, inden dach der verlossinghen.

31

Alle bitterheyt, ende gramscap, ende onweerdicheyt, ende gheroep ende blasphemie laet van v lieden wech ghedaen worden, met alderley quaetheyt.

32

Maer weest tot malcanderen goedertieren, bermhertich, vergheuende malcanderen, ghelijck oock Godt in Christo v vergheuen heeft.